بۇگىنگى تاڭدا ەلىمىزدە ەرەكشە ءبىلىم بەرۋ قاجەتتىلىكتەرى بار بالالاردىڭ پروبلەمالارى وزەكتى. دەرەكتەرگە سۇيەنسەك, سوڭعى 10 جىلدا الەم بويىنشا زاعيپ بالالاردىڭ سانى بىرنەشە ەسە ءوستى. دامىعان ەلدەردە ولاردىڭ دامۋىنداعى ەرەكشەلىكتەرىن اۋرۋ رەتىندە ەمەس, جاعداي رەتىندە قابىلداپ, ەرەكشە بالالارمەن جۇمىس ىستەۋدىڭ مەديتسينالىق مودەلىنەن ءبىلىم بەرۋ مودەلىنە كوشتى. ينكليۋزيۆتى ءبىلىم بەرۋدى ىسكە اسىرۋ جولىندا قازاقستاندىق ماماندار جاڭا ادىستەر مەن باعدارلامالاردى اشتى.
استانا قالاسىنىڭ №10 مەكتەپ-گيمنازياسىندا كورۋ قابىلەتى بۇزىلعان 180 بالا وقيدى, ونىڭ ىشىندە 29 بالا زاعيپ. ولاردى وقىتۋ ءۇشىن بارلىق قاجەتتى جاعداي جاسالۋدا. مەكتەپتە بالالار ءۇشىن ارنايى پەداگوگ-اسسيستەنتتەر مەن تاربيەشىلەر جۇمىس ىستەيدى.
– 2015 جىلدان باستاپ مەكتەپتە كورۋ قابىلەتى بۇزىلعان بالالارعا ارنالعان سىنىپتار اشىلدى, – دەيدى مەكتەپ ديرەكتورى باقىتجان ورىنباەۆ.
بۇل ءبىلىم ورداسى – ەلوردادا زاعيپتارعا ارنالعان سىنىپتار جۇمىس ىستەيتىن جالعىز مەكتەپ.
جۋىردا مەكتەپتە جوعارى دەڭگەيدە ۇيىمداستىرىلعان كونفەرەنتسيا ءوتتى. ماقساتى – ارنايى جانە ينكليۋزيۆتى ءبىلىم بەرۋدى دامىتۋدا عىلىم مەن تاجىريبەنىڭ جانە الەۋمەتتىڭ كۇش-جىگەرىن بىرىكتىرۋ.
وكىنىشكە قاراي, ەلىمىزدە مۇمكىندىگى شەكتەۋلى بالالار جىلدان-جىلعا ارتىپ كەلەدى, ياعني الدىڭعى جىلمەن سالىستىرعاندا زاعيپ جاندار سانى 8000 ادامعا ارتقان. بۇل دەگەنىمىز ينكليۋزيۆتى مەكتەپتەر سانىن ارتتىرۋ كەرەگىن بىلدىرەدى.
كونفەرەنتسياعا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى كەنجەعۇل سوتسيالۇلى, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جانە م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ پروفەسسور-وقىتۋشىلار قۇرامى, قايىرىمدىلىق قورلاردىڭ وكىلدەرى, رەسپۋبليكالىق كوررەكتسيالىق پەداگوگيكا جانە نەيروپسيحولوگيا ءبىلىم بەرۋ ورتالىعىنىڭ وكىلدەرى, كورەيا, Dot Incorporation كومپانياسىنىڭ وكىلى, ىستانبۇل قالاسى, تيۋركان ساباندجي اتىنداعى كورۋ قابىلەتى بۇزىلعان بالالارعا ارنالعان مەكتەپ-ينتەرناتىنىڭ ديرەكتورى, جالپى ورتا ءبىلىم بەرۋ ۇيىمدارى مەن ارنايى ءبىلىم بەرۋ ۇيىمدارىنىڭ باسشىلارى, پسيحولوگيالىق-مەديتسينالىق-پەداگوگيكالىق كوميسسيا باسشىلارى, مۇعالىمدەر, باق وكىلدەرى, مۇگەدەك ادامداردىڭ قوعامدىق بىرلەستىگىنىڭ وكىلدەرى, اتا-انالار قاتىستى.
كونفەرەنتسيا پانەلدىك پىكىرتالاس, كەيس-سەسسيا, benchmarking, workshop, شەبەر-سىنىپ جانە ينتەراكتيۆ فورماتىندا ءوتتى.
گاۋھار امانگەلدى,
ل.گۋميلەۆ اتىنداعى
ەۋرازيا ۇلتتىق ۋنيۆەرسيتەتىنىڭ 2-كۋرس ستۋدەنتى
