كەشە استاناداعى قولجازبالار جانە سيرەك كىتاپتار ۇلتتىق ورتالىعى مەن استانا قالاسىنىڭ مەملەكەتتىك ءارحيۆى «زۇلمات زامان قاسىرەتى» اتتى ارحيۆ قۇجاتتارىنىڭ كورمەسىن وتكىزدى. شاراعا مادەنيەت جانە سپورت مينيسترلىگى ارحيۆ ىستەرى جانە قۇجاتتامانى باسقارۋ كوميتەتىنىڭ وكىلدەرى, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ عالىم-پروفەسسورلارى, «الجير» مەموريالدى-مۇراجاي كەشەنى قىزمەتكەرلەرى, ستۋدەنتتەر جانە مەكتەپ وقۋشىلارى قاتىستى.
كورمەنى اشقان قولجازبالار جانە سيرەك كىتاپتار ۇلتتىق ورتالىعىنىڭ ديرەكتورى جاندوس بولدىقوۆ جانە استانا قالاسى مەملەكەتتىك ءارحيۆىنىڭ باسشىسى بەرىك تورەبەكوۆ تاريحتى ەسكە الۋ, باعالاۋ, مۇرالاردى كەلەشەك ۇرپاققا جەتكىزۋدىڭ ماڭىزى تۋرالى ايتتى. وسىدان تۋرا وتىز جىل بۇرىن ەلىمىزدە «جاپپاي ساياسي قۋعىن-سۇرگىن قۇرباندارىن اقتاۋ تۋرالى» زاڭنىڭ قابىلدانۋى ۇلكەن سەرپىلىس اكەلدى. ال تاريحىمىزداعى «اقتاڭداق بەتتەر» ەل ەسىندە ماڭگى ساقتالۋى ءۇشىن 1997 جىلى قازاقستان رەسپۋبليكاسىنىڭ پرەزيدەنتى جارلىعىمەن 31 مامىر ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى دەپ بەكىتىلدى. سودان بەرى كەڭەستىك سولاقاي ساياسات قۇرباندارىن ەسكە الۋ, ولاردى جازىقسىز جاعىلعان قارا كۇيەدەن ارشۋ بۇگىنگى ۇرپاقتىڭ پارىزىنا اينالدى. 2020 جىلى 24 قاراشادا مەملەكەت باسشىسى قاسىم-جومارت توقاەۆ «ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا تۋرالى» جارلىققا قول قويدى. بۇل باعىتتا ءبىراز جۇمىس اتقارىلدى. جيىندا ءسوز سويلەگەن تاريحشىلار وسىنى اتاپ ءوتتى.
قارالى جىلدار جايىندا شاعىن فيلم كورسەتىلىپ, جادىگەرلەر تانىستىرىلدى. كورمە ءۇش بولىمنەن قۇرالدى. بۇل – اشارشىلىق قۇرباندارى جايلى فوتودەرەكتەر, اشارشىلىق قۇرباندارىنا قاتىستى كىتاپتار جانە «ارحيۆ-20-25» مەملەكەتتىك باعدارلاماسى اياسىندا رەسەي, ءۇندىستان, تۇركيا سياقتى شەتەلدىك ارحيۆتەردەن, عىلىمي ورتالىقتاردان اكەلىنگەن قۇجاتتار. تاريحي دەرەكتەر وقۋشىلار مەن جاستاردىڭ تاريحقا دەگەن قىزىعۋشىلىعىن ارتتىردى. مىسالى, لاتىن الىپبيىنە كوشۋ تاريحى, كيريلليتسا تەك وتارسىزداندىرۋ ماقساتىندا ەنگىزىلدى دەگەن پىكىرلەر ايتىلدى.
– قازىر ولگەنىمىز ءتىرىلىپ, وشكەنىمىز قايتا جانعانداي كەزەڭدەمىز. حالقىمىزدىڭ باسىنان وتكەن قايعىلى جاعدايلاردى وسكەلەڭ ۇرپاققا جەتكىزۋ – بۇل كورمەنىڭ نەگىزگى ماقساتى. جاپپاي ساياسي قۋعىن-سۇرگىن جانە ميلليونداعان ادامنىڭ قازا بولۋىنا اكەپ سوققان اشارشىلىق – تاريحىمىزدىڭ ەڭ اۋىر كەزەڭىنىڭ ءبىرى. وتكەندى ەسكە الۋ, مۇرامىزدى ساقتاۋ – پارىزىمىز, – دەيدى تاريحشى عالىم مۇحامەدقالي بايمۇقانوۆ.
جىبەك راحيموۆا,
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 2-كۋرس ستۋدەنتى
