ءبىرمانداتتى وكرۋگتەن سايلاۋعا تۇسكەن 266 ۇمىتكەر 5 پايىزدان از داۋىس جينادى. بۇل تۋرالى ورتالىق سايلاۋ كوميسسياسىنىڭ مۇشەسى ءسابيلا مۇستافينا ءمالىم ەتتى.
«ءبىرمانداتتى وكرۋگتەر بويىنشا ءماجىلىس سايلاۋىنا قاتىسقان 370 كانديداتتىڭ 104-ىنە سايلاۋ جارناسى قايتارىلادى. قالعان 266 ۇمىتكەر 5%-دان از داۋىس جينادى. سايلاۋ جارناسى ەكى پارتياعا دا قايتارىلادى. ولار – جالپىۇلتتىق سوتسيال-دەموكراتيالىق پارتياسى مەن Respublica پارتياسى. ال «بايتاق» جاسىلدار پارتياسى مەجەلى داۋىستى جيناي المادى. قالعان پارتيالار كونستيتۋتسيالىق زاڭنىڭ 88-بابىنا سايكەس, سايلاۋ جارناسىن ەنگىزبەدى. ويتكەنى ولار بۇرىن ءماجىلىس سايلاۋىنا قاتىسقان جانە 5 نەمەسە ودان دا كوپ پايىز داۋىس جيناعان. سوندىقتان ولار سايلاۋ جارناسىن تولەمەيدى» دەدى وسك مۇشەسى.
ايتا كەتەيىك, ءبىرمانداتتى وكرۋگتەر بويىنشا ءماجىلىستىڭ مانداتىنا ۇمىتكەرلەر 1 ملن 50 مىڭ تەڭگە مولشەرىندە سايلاۋ جارناسىن تولەۋى ءتيىس.
