وتكەن اپتادا استانادا ون ءبىر جول اپاتى تىركەلدى. سولاردىڭ سالدارىنان ءبىر ادام اجال قۇشتى, 14-ءى ءارتۇرلى دەڭگەيدە جاراقاتتالدى.
«تويوتا كامريدى» تىزگىندەگەن 60 جاستاعى جۇرگىزۋشى ق.مۇڭايتپاسوۆ كوشەسىندە باعدارشامنىڭ رۇقسات ەتكەن بەلگىسىمەن ميرزويان كوشەسىنە بۇرىلا بەرگەندە قارسى كەلە جاتقان تەمىر تۇلپاردى وتكىزبەي, 27 جاستاعى ەلوردا تۇرعىنى باسقارعان «بمۆ» كولىگىمەن سوقتىعىستى. «تويوتانىڭ» جۇرگىزۋشىسى مەن ەكى جولاۋشىسى ءتۇرلى جاراقاتتارمەن جاقىن ماڭداعى اۋرۋحاناعا جەتكىزىلدى. ءبىر اپتا ىشىندە ەلوردالىق جول ساقشىلارى جول ءجۇرۋ ەرەجەلەرىن بۇزۋدىڭ 6 مىڭ دەرەگىن انىقتاعان. سونىڭ ىشىندە 81 جۇرگىزۋشى كولىكتى ماس كۇيىندە جۇرگىزىپ, 599-ى باسىپ وزۋدىڭ ءتارتىبىن ساقتاماعان, 590-ى جىلدامدىقتى شەكتەن اسىرعاندارى ءۇشىن ۇستالدى. ال, 285 استانالىق جۇرگىزۋشى كولىكتەرىن قاۋىپسىزدىك بەلدىگىن تاقپاي جۇرگىزگەن, 116-سى جاياۋ جۇرگىنشىلەردى وتكىزبەگەن. رۇقسات ەتىلمەگەن جەردەن وتكەن 511 جاياۋ جۇرگىنشىگە ايىپپۇل سالىندى.
ەركەجان ساتىمبەك
