استانا قالاسى مەكتەپتەرىنىڭ وقۋشىلارى اراسىندا «استانا ۇلاندارىنىڭ داۋىسى» ءى قالالىق بايقاۋى ءوتتى.
ەلىمىزدە كەنجەلەپ قالعان بالالار ونەرىنىڭ دامۋىنا جاڭا تىنىس بەرىپ, ءتول ونەرىمىزدىڭ دامۋىنا ۇلەس قوسۋ ماقساتىندا ۇيىمداستىرىلعان بايقاۋ ءتورت اتالىمعا ءبولىندى. بۇل – «ەسترادالىق باعىتتاعى ورىنداۋشىلار», «ءداستۇرلى باعىتتاعى ورىنداۋشىلار», «ۆوكالدى توپتار» جانە «تەرمە-تولعاۋلار ورىنداۋشىلار».
بايقاۋعا قالاداعى 40-تان استام مەكتەپتەن 7-17 جاس ارالىعىنداعى 70-كە جۋىق وقۋشى قاتىستى. ولار ۇستاز, سازگەر كاكىم ەردىبايتەگىنىڭ ءان-تەرمە, تولعاۋلارىن ورىندادى.
– مۇنداي بايقاۋ العاش رەت ءوتىپ جاتىر. جازعان ءانىڭ نە كۇيىڭ ساحنادا ورىندالسا, ىشتەي قۋاناسىڭ. ال كورەرمەننىڭ جۇرەگىنەن ورىن تاپسا, ەلدىڭ يگىلىگىنە جاراپ جاتسا, شىعارماشىلىق ادامى ءۇشىن ودان ۇلكەن باقىت جوق دەپ ەسەپتەيمىن. جالپى, بالالاردىڭ ىشكى جان دۇنيەسى تازا بولىپ ءوسۋى كەرەك. ماعجان جۇماباەۆ ايتقانداي, بالا ءان ۇيرەنىپ, ولەڭ جاتتاپ, سۋرەت سالىپ وسسە, ىشكى جان دۇنيەسى دە باي تۇسەدى, – دەدى سازگەر كاكىم ەردىبايتەگى.
قازىلار القاسىنىڭ مۇشەسى ماقسات ءحامزيننىڭ ايتۋىنشا, مۇندا ونەرپازدىڭ انا تىلىندە, ياعني قازاق تىلىندە تازا ايتۋىنا, داۋىس دياپازونىنا, ءسوزدىڭ ديكتسياسىنا, كيىم كيىسىنە اسا ءمان بەرىلدى.
– بايقاعانىڭىزداي, بۇلار كىشكەنتاي بالالار عوي. ماسەلەن, بىرەۋى قىلىعىمەن ءتاتتى بولادى, ال ەندى بىرەۋىنىڭ داۋىس مۇمكىندىگى بار. سولاردىڭ بارلىعىن ءجىتى ەسكەرىپ وتىرمىز, – دەدى ول.
سابينا كاكىمجان
