ءيا, ءبىز كوزبەن كورىپ, سانامەن تۇيەمىز. ال جۇرەكپەن تىڭداي بىلەمىز بە؟ قازاق ۇلتتىق ونەر ۋنيۆەرسيتەتىنىڭ ءماجىلىس زالىندا وتكەن «قاراڭعىدا» كونتسەرتىنەن وسىنداي وي تۇيدىك.
ساحنا. قاپ-قاراڭعى تۇنەك. كوزبەن كورىپ ۇيرەنىپ قالعان بىزگە ۇيىمداستىرۋشىلار جۇرەكپەن تىڭداۋدىڭ تىڭ ءتاسىلىن ۇسىنعانداي.
كونتسەرتتە ەرەكشە جاندار مەن ونەر ۋنيۆەرسيتەتىنىڭ ونەرپازدارى شىعارماشىلىعىمەن ءبولىسىپ, ءان ايتتى, ولەڭ وقىدى.
«ميراس» قوعامدىق قورىنىڭ پرەزيدەنتى ءجۇزباي سەرىك:
– 2010 جىلى مامىر ايىندا ادىلەت دەپارتامەنتىندە تىركەلىپ, قايىرىمدىلىق باعىتىندا قىزمەت ەتىپ كەلەمىز. قوعامداعى تاستاندى, جەتىم بالالاردى رۋحاني قولداپ, زاعيپ جانداردىڭ قابىلەت-قاسيەتىن شىڭداپ, تانىلۋىنا جۇمىس ىستەۋدەمىز. جىلدا سپورت سالاسىندا جەتىستىككە جەتكەن ەرەكشە جانداردى ناسيحاتتايمىز. بيىل زاعيپ جانداردىڭ ونەرىن دارىپتەۋدى قولعا الدىق, – دەدى.
كونتسەرت باستالماس بۇرىن سۋرەت كورمەسى ۇيىمداستىرىلىپ, ونداعى سۋرەتتەردى زاعيپ جاندار جۇرەگىمەن تانىپ-بىلۋگە جاعداي جاسالدى.
مۇنى ءجۇزباي سەرىك بىلاي ءتۇسىندىردى: «سۋرەتتىڭ يدەياسى جانە وندا كورسەتىلگەن گرافيكانى «audio discreet» اۋديو جازبا ارقىلى ەرەكشە جاندارعا تۇسىندىرىلەدى. بۇل – جۇرەكپەن تانۋدىڭ جولى. كونتسەرتىمىز قاراڭعىدا ورىندالادى. بۇل دا جۇرەكپەن تىڭداۋدىڭ ناق ءوزى».
ونەرپاز, اقىن نۇردانا ارعىن كۇيشى قۇرمانعازىنىڭ «سارىارقا» كۇيىن Yamaha-مەن ورىنداپ, ءوزىنىڭ «اڭسايمىن جارىق كۇندى» ءانىن شىرقاپ, كورەرمەننىڭ كوڭىلىن بوساتتى.
ال ءداستۇرلى ءانشى, ايتىسكەر اقىن العىسبەك داۋەنۇلى اقيىق اقىن مۇقاعالي ماقاتاەۆتىڭ سوزىنە جازىلعان «جانارسىز ادام كەلەدى» جانە ەسەنقۇل جاقىپبەكتىڭ «ءومىر سۇرگىم كەلەدى» ءانىن ورىندادى. بۇل ەكى ولەڭنىڭ مۋزىكاسىن ءوزى جازعان ەكەن.
«ءسات» توبىنىڭ ءانشىسى ازات ابىلداەۆ ورىنداۋىنداعى اندەر دە كوپشىلىكتىڭ تانىم تارازىسىن بيىكتەتە ءتۇستى.
ءجۇزباي سەرىك تە ونەردەن تالاسى بار, سەگىز قىرلى, ءبىر سىرلى ازامات ەكەن. احمەت بايتۇرسىنۇلىنىڭ مونوگولىن ورىنداپ, ءوزىنىڭ «شۇكىر دەيىكشى» اتتى ولەڭىن وقىپ بەردى.
