الەۋمەتتىك تولەمدەر كولەمى ۇلعايىپ كەلەدى
قالالىق ءماسليحاتتىڭ بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسياسىنىڭ كەزەكتى وتىرىسىندا ازاماتتاردىڭ جەكەلەگەن ساناتتارىنا الەۋمەتتىك كومەك كورسەتۋ ماقساتىندا اتقارىلىپ جاتقان جۇمىستار كەڭىنەن تالقىلاندى.
وسىعان وراي ءسوز العان قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ءلاززات ابۋەۆا بۇل ماسەلە مەملەكەت باسشىسى نۇرسۇلتان نازارباەۆتىڭ ۇنەمى نازارىندا ەكەنىن ەسكەرە كەلە, ەلباسى جولداۋلارىنان تۋىنداعان تاپسىرمالارعا سايكەس, ەلوردادا از قامتىلعان وتباسىلار مەن قامقورلىققا ءزارۋ ازاماتتارعا الەۋمەتتىك كومەك كورسەتۋ باعىتىندا جۇزەگە اسىرىلعان شارالارعا توقتالدى. بۇل رەتتە استانادا حالىققا الەۋمەتتىك جاعىنان قولداۋ كورسەتىپ, ولاردىڭ مۇددەسىن قورعاۋ ماقساتىندا اتقارىلىپ جاتقان جۇمىس از ەمەس.
– وتكەن جىلى الەۋمەتتىك قولداۋعا ءزارۋ 75 مىڭداي ادامعا 3 295 450 مىڭ تەڭگە كولەمىندە كومەك كورسەتىلسە, بيىل الەۋمەتتىك تولەمدەرگە 4 231 496 مىڭ تەڭگە ءبولۋ كوزدەلىپ وتىر. ونىڭ تەڭ جارتىسى جەرگىلىكتى بيۋدجەت قاراجاتى ەسەبىنەن تولەنەدى,- دەدى ل.ابۋەۆا.
بيۋدجەت قاراجاتى ەسەبىنەن «جەرگىلىكتى وكىلەتتى ورگانداردىڭ شەشىمى بويىنشا ازاماتتاردىڭ جەكەلەگەن ساناتتارىنا الەۋمەتتىك كومەك» باعدارلاماسىندا 2015 جىلى ازاماتتاردىڭ جەكەلەگەن ساناتتارىنا 2 602 820 مىڭ تەڭگە كولەمىندە الەۋمەتتىك كومەك كورسەتىلمەكشى.
ۇلى وتان سوعىسىنداعى جەڭىستىڭ 70 جىلدىعىن مەرەكەلەۋ شەڭبەرىندە جۇرگىزىلگەن جۇمىستارعا دا قوماقتى قارجى ءبولىنىپ, 217 مايدانگەر مەن سولارعا تەڭەستىرىلگەن 5 000 ادامعا, سونداي-اق تىل ەڭبەكەرلەرىنە ماتەريالدىق كومەك كورسەتىلگەن. سوعىس ارداگەرلەرى بىرىڭعاي كيىممەن قامتاماسىز ەتىلىپ, ۇرىس دالاسىندا قازا بولعان قازاقستاندىق جاۋىنگەرلەر جەرلەنگەن جەرلەرگە بارۋ ءۇشىن الەۋمەتتىك كومەك پەن ءدارى-دارمەك ساتىپ الۋعا, شيپاجايلىق-كۋرورتتىق ەمدەلۋگە جەڭىلدىكتەر قاراستىرىلدى. ۇلى وتان سوعىسىنىڭ ارداگەرلەرى مەن سولارعا تەڭەستىرىلگەندەر جانە بارلىق زەينەتكەرلەر, مۇگەدەكتەر مەن كوپ بالالى انالار قالالىق قوعامدىق كولىكتە تەگىن جول ءجۇرۋ, تىستەرىن اقىسىز پروتەزدەۋ قۇقىنا يە. وسى جونىندە ايتا كەلە, باسقارما باسشىسى استانادا از قامتىلعان وتباسىلاردى قولداۋ ماقساتىندا اتاۋلى الەۋمەتتىك كومەك كورسەتىلىپ جاتقانىن, سونىمەن قاتار كوممۋنالدىق قىزمەتتەرگە, تۇرعىن ءۇي كۇتىمىنە ارناۋلى زاڭنامادا بەلگىلەنگەن ءتارتىپپەن تەلەكوممۋنيكاتسيا جەلىسىنە قوسىلعان تەلەفون ءۇشىن ابونەنتتىك تولەماقىنىڭ ۇلعايۋى بولىگىندەگى بايلانىس قىزمەتتەرىنە تولەمدەردى تولەۋگە, قالاداعى رەسمي مەرزىمدى باسىلىمدارعا جازىلۋعا, مونشالارعا, شاشتارازعا بارۋعا اقشالاي تولەم تۇرىندە كومەك كورسەتىلىپ جاتقانىن جەتكىزدى.
– ەل ەكونوميكاسى قارىشتاپ دامىعان سايىن حالىقتىڭ الەۋەتى جاقسارىپ, تۇرمىسى تۇزەلىپ كەلەدى. ال, زەينەتاقى مەن الەۋمەتتىك تولەمدەر مولشەرىنىڭ كەزەڭ-كەزەڭىمەن ارتۋى وعان دالەل بولسا كەرەك. بۇل رەتتە قالا باسشىلىعى دا الەۋمەتتىك سالادان قارجىسى مەن كومەگىن اياپ قالىپ جاتقان جوق. وزگە وڭىرلەردىڭ جۇمىسسىز ازاماتتارى ءبىزدىڭ قالاعا كەلىپ جۇمىس ىستەپ, تابىس تاۋىپ ءجۇر. وسىنىڭ ءوزى قالامىزداعى الەۋمەتتىك ماسەلەلەردىڭ وڭ شەشىمىن تاۋىپ, حالىق تۇرمىسىنىڭ جاقسارىپ كەلە جاتقانىن كورسەتەدى, – دەدى باسقارما باسشىسى.
دەمەك, وتكەن جىلمەن سالىستىرعاندا بيىل ەلوردالىقتارعا كورسەتىلەتىن الەۋمەتتىك كومەك كولەمى 1 ملرد تەڭگەگە ۇلعايعان. وسىعان قاراپ-اق, ەلوردالىقتاردىڭ جاعدايى شىن مانىندە جاقسارىپ كەلە جاتقانىن اڭعارۋ قيىن ەمەس. الەۋمەتتىك ماسەلە ويداعىداي شەشىلمەيىنشە, ەلدىڭ تۇرمىستىق احۋالى جاقسارمايتىنى بەلگىلى. وسىنى ەسكەرگەن قالالىق ءماسليحاتتىڭ حاتشىسى سانسىزباي ەسىلوۆ الداعى ۋاقىتتا الەۋمەتتىك كومەكتىڭ ناقتى قامقورلىققا ءزارۋ ادامدارعا كورسەتىلۋىن مىقتاپ قاداعالاۋدى تاپسىردى.
گۇلبارشىن وكەشقىزى