وسى اپتادا ۋەفا اياسىنداعى چەمپيوندار ليگاسى مەن ەۋروپا ليگاسىندا توپتىق باسەكەنىڭ سوڭعى تۋرى وتەدى. قازاقستان اتىنان ەل نامىسىن قورعاپ جۇرگەن «استانا» كومانداسى شەشۋشى ويىندى سىرت الاڭدا فرانتسيانىڭ «رەنن» كلۋبىنا قارسى وتكىزەدى.
«استانا» توبىنان الداعى جىلدىڭ كوكتەمىندە باستالاتىن پلەي-وفف ويىندارىنا كيەۆتىڭ «دينامو» كومانداسى الدىن الا شىعىپ قويدى. ولار بەس تۋردا 11 ۇپاي جيناپ الدى. ال ازىرگە ەكىنشى ورىنعا تۇراقتاعان «استانا» 9 ۇپايدى ەنشىلەپ تۇر. ءۇشىنشى ورىنداعى «رەنن» قورجىنىندا 6 ۇپاي بار. سوڭعى ورىنداعى چەحيانىڭ كەلەسى اينالىمعا وتۋگە مۇمكىندىگى جوق.
مىنە, تۋرنير كەستەسىندەگى وسىنداي جاعدايعا بايلانىستى بەيسەنبى كۇنى وتەتىن سوڭعى التىنشى تۋردا قاي كوماندانىڭ ەكىنشى ورىننان پلەي-وفف ويىندارىنا وتەتىنى بەلگىلى بولادى. ءبىزدىڭ كوماندا ءۇشىن تەڭ ناتيجە دە جەتكىلىكتى بولادى. ولاي بولسا, ەۋروپا باسەكەسىندە بەدەلدى كومانداعا اينالا باستاعان «استانا» فۋتبولشىلارى بۇل جولى دا نامىستى قولدان بەرمەيدى دەپ سەنەمىز.
ەسكە الار بولساق, «استانا» وسىعان دەيىن ءبىر رەت چەمپيوندار ليگاسىنىڭ, ەكى رەت ەۋروپا ليگاسىنىڭ توپتىق تۋرنيرىندە ونەر كورسەتكەن بولاتىن. مۇنداي كورسەتكىشكە قاتارىنان ەلىمىزدىڭ 5 دۇركىن چەمپيونى بولعان ەلوردالىق «استانا» عانا جەتىپ وتىر.
سونىمەن, بەيسەنبى كۇنى 23.55-تە فرانتسيادا «استانا» مەن «رەنن» ماتچى باستالادى. كورەيىك. سەنەيىك.
