فۋتبولدان قازاقستان چەمپيوناتىنىڭ جاڭا ماۋسىمى باستالدى. پرەمەر-ليگانىڭ ءبىرىنشى تۋرىندا قازىرگى چەمپيون «استانا» ءوز الاڭىندا ورالدىڭ «اقجايىعىنا» جاۋاپسىز ءۇش گول سوعىپ, العاشقى ءۇش ۇپايىن ەنشىلەدى.
استانالىقتار ءا دەگەننەن قارسىلاسقا ءتىسىن باتىرىپ, 7-مينۋتتا ەسەپ اشتى. ويىنى ءجۇرىپ تۇرعان مارين توماسوۆ ايىپ دوبىن مۇلتىكسىز ورىندادى. «اقجايىق» قۇرعان قامالدان ءارى اسقان دوپتى سەرگەي تكاچۋكتىڭ قايتارۋى مۇمكىن بولمادى. «استانانىڭ» جارتىلاي قورعاۋشىسى وسىمەن ءتورتىنشى ويىن قاتارىنان گول سوقتى. ول بۇعان دەيىن «سپورتينگپەن» بولعان قوس ماتچتا جانە «قايراتقا» قارسى سۋپەركۋبوكتا ەرەكشەلەنگەن.
ەكىنشى گولعا دا توماسوۆ ارالاستى. ونىڭ بۇرىشتامادان كوتەرگەن دوبىن سەرگەي مالىي قاقپاعا ءدال باعىتتادى. ويىن سەرىكجان مۋجيكوۆتىڭ گولىمەن قورىتىندىلاندى. بۇل گول دا توماسوۆتىڭ ارقاسىندا سوعىلدى. وسىلايشا «استانا» تۋرنير كەستەسىندە كوش باستادى.
قپل-دىڭ قالعان ماتچتارىنا كەلسەك, «ەرتىس» ءوز جەرىندە «اتىراۋدى» 2:1 ەسەبىمەن جەڭسە, ءدال وسىنداي كورسەتكىشپەن «ورداباسى» «شاحتەردەن» باسىم ءتۇستى. «قايرات» پەن «قىزىلجار» كەزدەسۋىندە دە 2:1 ەسەبى تىركەلدى. ال «جەتىسۋ» – «توبىل», «قايسار» – «اقتوبە» ويىندارىنىڭ ەكەۋىندە دە قوناقتار 0:1 ەسەبىمەن جەڭىپ كەتتى.
جالپى بىرىنشىلىكتىڭ العاشقى تۋرىنىڭ ويىندارىن 30000 جانكۇيەر تاماشالادى. سونىڭ ىشىندە 12000 حالىقتى «ورداباسى» مەن «شاحتەر» ماتچى جينادى.
«استانا» كومانداسىنىڭ باس باپكەرى:
– ءبىزدىڭ بۇگىن شابۋىلدا ويلاستىرعانىمىزدىڭ كوبى جۇزەگە اسپادى. مۇمكىن جىگىتتەر قارسىلاستى جەتە باعالامادى نەمەسە «قايراتتى» جەڭگەننەن سوڭ بوساڭسىپ قالدى. بىراق بۇل اقتالۋ ەمەس, ءبىز مىقتى ويناۋىمىز كەرەك. جەڭىسكە لايىق بولدىق, بىراق ويىن ساپاسىنا كوڭىلىم كونشىمەدى.
ورىنبەك وتەمۇرات
