ۇلىستىڭ ۇلى كۇنى قارساڭىندا «قازاقستان» ورتالىق كونتسەرت زالىندا جاس ءانشى ءاليا ابىكەن «ءان گاككۋى» اتتى مەرەكەلىك كونتسەرتىن وتكىزەدى. قازاق ەستراداسىندا حالىق اندەرىن ناقىشىنا كەلتىرىپ ورىندايتىن ونىڭ رەپەرتۋارىنداعى تۋىندىلاردىڭ كوبى ءسوزى مەن اۋەنى ۇيلەسىم تاپقان حالىق اندەرى. شىعارماشىلىق تالعامى جوعارى ءانشىنىڭ مەرەكەلىك باعدارلاماسى جايلى وسى كونتسەرتتى ۇيىمداستىرۋشى, قازاقستاننىڭ ەڭبەك سىڭىرگەن ءارتىسى مايرا ىلياسوۆامەن اڭگىمەلەسكەن ەدىك.
– مايرا اپاي, ءاليانىڭ كونتسەرتىن ۇيىمداستىرىپ ءجۇرگەن ونەردەگى جاناشىر ءاپكەسى بولاسىز. استانا ءتورىندە وتەتىن كونتسەرتكە دايىندىقتارىڭىز قالاي؟
– بۇگىندە دايىندىق جۇمىستارى ءجۇرىپ جاتىر. قالا اكىمدىگىنىڭ قولداۋىمەن 22 ناۋرىز كۇنى ەلوردالىقتارعا قازاقتىڭ تاماشا ءداستۇرلى ءاندەرىنەن شاشۋ شاشىپ, مەرەكەلىك باعدارلامامىزدى ۇسىنامىز. تالعامى بيىك, تىڭدارمانى كوپ ءانشىنىڭ ەلوردا تورىندە ناۋرىز تويى قارساڭىندا ونەر كورسەتۋى – قازاقتىڭ انىنە بەرىلگەن ۇلكەن باعا دەپ بىلەمىن.
– بۇگىنگى قازاق ەستراداسىندا حالىق اندەرىن ادەمى ورىندايتىن انشىلەر ساۋساقپەن سانارلىق. بۇل رەتتە ءاليانىڭ شىعارماشىلىعى تۋرالى نە ايتاسىز؟
– ءاليانىڭ ونەرىن العاش ماقپال ءجۇنىسوۆانىڭ ەسەپ بەرۋ كەشىندە كوردىم. ونىڭ بويىنداعى قازاق قىزىنا ءتان قاسيەتتەرى, ساحنادا ءوزىن-ءوزى ۇستاۋى, ەشكىمگە ۇقسامايتىن ساحنالىق كيىم ۇلگىسى ماعان قاتتى ۇنادى. تالانتتى ءانشىگە ماقپال ءجۇنىسوۆا قولداۋ كورسەتكەن. ودان كەيىن ءوزىمنىڭ «جان انام», «ساعىندىرعان اندەر-اي» جوبالارىما قاتىستىردىم. «قاسىمدا بولىپ, ماعان كومەكتەسسەڭىز» دەپ قولقا سالعان سوڭ, اليامەن بىرگە ەل ارالاپ, شىعارماشىلىق كەشتەرىن وتكىزىپ جاتىرمىز. حالىق ءوز باعاسىن بەردى.
استانادا وتەتىن كەشتە ءانشى «ءبۇلدىرگەن», «ەسىل دۇنيە-اي», «بۇلبۇلىم» «الاقاننان ۇشقان اققۋىم» سىندى حالىقتىق تۋىندىلارمەن قاتار «وكىنىش تامشىلارى», «ءومىرگە ساۋال» سىندى فيلوسوفيالىق ماعىناسى تەرەڭ ءاندەرىن ورىندايدى. ەكى ساعاتقا سوزىلاتىن ادەمى كەشتە حالىق اندەرى عانا شىرقالادى.
– كەش قوناقتارى كىمدەر؟
– كونتسەرتتە ءوزىم ءان سالامىن. ءداستۇرلى ءانشى ءلاززات جولامانوۆا, «سازگەن» انسامبلى, سونىمەن قاتار مەيرامبەك بەسباەۆتىڭ «تارتۋ» توبى ونەر كورسەتەدى. ودان بولەك اجەلەرىمىز, ساربازدارىمىز جانە مىڭ بۇرالعان بيشىلەرىمىز دە بار.
– اڭگىمەڭىزگە راحمەت!
گۇلميرا ايماعانبەت
