حالىق قالاۋلىلارى – ەڭبەك ۇجىمدارىندا
قالالىق ءماسليحاتتىڭ دەپۋتاتتارى قازاقستان مۇگەدەكتەرى وداعى مەن «تۇران-پروفي» حالىقارالىق كاسىپتىك اكادەمياسىندا بولىپ, تىنىس-تىرشىلىگىمەن تانىستى.
ءماسليحاتتىڭ كەزەكتى سەسسياسىنا دايىندالۋ بارىسىندا بۇل شارا «جۇمىسپەن قامتۋ-2020» باعدارلاماسىنىڭ استانا قالاسىندا قالايشا ىسكە اسىرىلىپ جاتقانىن ءبىلۋ ماقساتىندا ۇيىمداستىرىلدى. وسىعان وراي, حالىق قالاۋلىلارى الدىمەن قازاقستان مۇگەدەكتەرى وداعىنا باس سۇقتى. 2005 جىلى اشىلعان مەكەمەدە ءمۇگەدەكتەردىڭ جۇمىس ىستەۋىنە بارلىق جاعداي جاسالعان. مەكەمەدە جىل سايىن «شەكسىز ءمۇمكىندىكتەر» اتتى اكتسيا ۇيىمداستىرىلادى ەكەن. بۇل ءوز كەزەگىندە, مۇمكىندىگى شەكتەۋلى ازاماتتاردىڭ جۇمىسقا ورنالاسۋى مەن ولاردىڭ قوعامدىق ومىرگە بەيىمدەلۋىنە جول اشادى. وداقتىڭ ارقاسىندا 2011 جىلى مۇمكىندىگى شەكتەۋلى ازاماتتارعا لايىقتالىپ سالىنعان «جانات» تۇرعىن ءۇي كەشەنى پايدالانۋعا بەرىلگەن. ال, 2012 جىلى قازىرگى زامان جاعدايىندا مۇگەدەكتەردى جۇمىسقا ورنالاستىرۋدىڭ جوباسى ازىرلەندى. سونىمەن بىرگە وداق جانىندا مۇگەدەكتەر ارباسىن جيناستىرۋ مەن جوندەۋ تسەحى جۇمىس ىستەيدى. وندا وسى ءمۇمكىندىگى شەكتەۋلى ادامداردىڭ وزدەرى جۇمىسپەن قامتىلعان. تاعى ءبىر جاڭالىق: استانادا مۇگەدەكتەرگە ارنالعان ارنايى كولىك ءتۇرى – ينۆاتاكسي ىسكە قوسىلعان. وكىنىشكە قاراي, بۇگىندە باس قالامىزداعى قوعامدىق كولىكتەردە مۇمكىندىگى شەكتەۋلى ازاماتتاردى تاسىمالداۋ جاعى مۇلدە قاراستىرىلماعان.
– بۇگىنگى تاڭدا استانادا وسىنداي بەس ينۆاتاكسي بار. بىراق, بۇل تىم ازدىق ەتىپ وتىر. ءجۇرىپ-تۇرۋ ىڭعايلى بولۋ ءۇشىن بىزگە ءالى دە وسىنداي 20 كولىك كەرەك, – دەيدى قازاقستان مۇگەدەكتەرى وداعىنىڭ پرەزيدەنتى جانات وماربەكوۆ.
شىنىندا دا, بۇگىندە قولدا بار بەس ينۆاتاكسي قالاداعى ارباعا تانىلعان 580 ادامنىڭ بارىنە بىردەي ۋاقىتىلى قىزمەت كورسەتە المايدى. وسىعان وراي, ەلوردالىق حالىق قالاۋلىلارى بۇل ءماسەلەنىڭ شەشىلۋىنە قولۇشىن بەرۋدى قاراستىراتىن بولدى.
سونىمەن بىرگە مۇگەدەكتەردىڭ جۇمىسپەن قامتىلۋى دا ءالى كۇنگە دەيىن وزەكتىلىگىن جويماي كەلەدى. بۇل رەتتە ج.وماربەكوۆ بىردە-ءبىر مەملەكەتتىڭ مۇمكىندىگى شەكتەۋلى ازاماتتاردى تولىقتاي قامقورلىعىنا الا المايتىنىن ەسكەرە وتىرىپ: «بىزگە مۇگەدەكتەرگە ارنالعان قاجەتتى جۇمىس ورىندارى مەن جۇمىس بەرۋشىلەردىڭ ءتىزىمىن بەرسەڭىزدەر. دەنە مۇشەلەرىندەگى كەمىستىكتەر بولماسا, ءبىز دە بارلىق ادامدارمەن بىردەيمىز, مۇگەدەكتەر دە جۇمىس ىستەي الادى. سوندىقتان ولار قوعامنان شەتتەتىلمەۋى كەرەك» دەپ, ولاردى جۇمىسپەن قامتۋ قاجەتتىگىن العا تارتتى.
«تۇران-پروفي» حالىقارالىق كاسىپتىك اكادەمياسىندا بولعاندا اڭعارعانىمىز, اتالمىش وقۋ ورنى كەلەسى وقۋ جىلىنان باستاپ وقۋشىلاردى ينجەنەر ماماندىعى بويىنشا دا وقىتپاقشى. اكادەميانىڭ رەكتورى مانەن وماروۆ دەپۋتاتتاردى وسى باعىتتا جۇرگىزىلىپ جاتقان جۇمىستارمەن تانىستىردى.
جالپى, ءبىلىم مەكەمەسى ەلەكترونيكا جانە راديوتەحنيكا سالاسىندا ەلەۋلى تابىستارعا قول جەتكىزگەن. كەزدەسۋدە دىتتەلگەن جەرىنە جىقپىل-جىقپىل كەدەرگىلەردى دە ەلەمەي جەتۋگە قابىلەتتى وقۋ روبوتتارى دەپۋتاتتار نازارىنا ۇسىنىلدى. سونداي-اق, ەكسپو-2017 كورمەسىنە دايىندىق شەڭبەرىندە اكادەميادا كوپ جۇمىستار جۇرگىزىلىپ جاتقانىنا كۋا بولىپ قايتتىق.
گۇلبارشىن وكەشقىزى