كەشە كونگرەسس حولدا تاۋەلسىزدىك كۇنىنە ارنالعان «ماڭگىلىك ەل – مۇراتىم» اتتى رەسپۋبليكالىق اقىندار ايتىسى باستالدى. باس جۇلدەگە «التىن دومبىرا» تىگىلەتىن وسىنداي ايتىس ءۇشىنشى مارتە ۇيىمداستىرىلدى. ايتىسكەر اقىنداردىڭ بۇل جولعى دوداسىن دا «نۇر وتان» پارتياسىنىڭ قولداۋىمەن مادەنيەت جانە سپورت مينيسترلىگى وتكىزىپ وتىر.
مەملەكەت جانە قوعام قايراتكەرى, «قورقىت اتا» عىلىمي-زەرتتەۋ ورتالىعىنىڭ ديرەكتورى مىرزاتاي جولداسبەكوۆ, قازاقستاننىڭ حالىق ءارتىسى ءاسانالى ءاشىموۆ, پارلامەنت ءماجىلىسىنىڭ دەپۋتاتى ورازكۇل اسانعازى, قر ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان, «ارا» ساياسي-قوعامدىق جۋرنالىنىڭ باس رەداكتورى, ساتيريك كوپەن امىربەك, «قازاقستان رەسپۋبليكاسى ارداگەرلەر ۇيىمى» رقب ورتالىق كەڭەسىنىڭ توراعاسى ومىرزاق وزعانباەۆ جانە ايتىسكەر اقىن مۇحامەدجان تازابەك قازىلىق ەتىپ وتىرعان ايتىسقا ەلىمىزدىڭ تۇكپىر-تۇكپىرىنەن كەلگەن 22 اقىن قاتىسۋدا.
ولاردىڭ اراسىندا «ايتىستىڭ كيللەرى» اتانعان بەكارىس شويبەكوۆ, تۇرعىلاستارى «اسان قايعى» اتاپ كەتكەن ايبەك قاليەۆ, بالعىنبەك يماشەۆ, اينۇر تۇرسىنباەۆا, سارا توقتامىسوۆا سىندى ايتىسسۇيەر قاۋىمعا جاقسى تانىس ەسىمدەر بار. سونداي-اق, ايتىس ساحناسىنان كوپتەن كورىنبەي كەتكەن ماڭعىستاۋلىق نۇرلان مۇساەۆ تا ءسوز دوداسىنا شيىرشىق اتىپ كەلىپتى.
ەستەرىڭىزگە سالا كەتەيىك, «التىن دومبىرانىڭ» العاشقى يەگەرى قىزىلوردالىق مۇحتار نيازوۆ بولدى. بىلتىر ول جانداربەك بۇلعاقوۆتىڭ قولىنا ءتيدى. بيىلعى جەڭىمپاز بۇگىن انىقتالادى. ايتىستىڭ قورىتىندىسىن گازەتىمىزدىڭ كەلەسى سانىندا جاريالايتىن بولامىز.
امانعالي شميتۇلى
