دەنەشىنىقتىرۋ ساباعىن ۇلتتىق بىرىڭعاي تەستىلەۋگە ەنگىزۋ قاجەت پە؟
جۇماتاي اليەۆ, پارلامەنت ءماجىلىسىنىڭ دەپۋتاتى:
دەنەشىنىقتىرۋ ءپانىن بىرىڭعاي ۇلتتىق تەستىلەۋ پاندەرىنىڭ قاتارىنا, ءتىپتى جوعارى وقۋ ورىندارىندا مەملەكەتتىك ەمتيحانعا ەنگىزۋ قاجەت.
قازاقستاننىڭ كوك بايراعىن جەتى رەت كوككە كوتەرگەن لوندونداعى جەتىستىكتەرىمىز, بۇقارالىق سپورتتى جاڭا زامانعا سايكەس جاڭارتۋدىڭ جولىن كورسەتىپ وتىر. سپورتتى دامىتا وتىرىپ كوپتەگەن الەۋمەتتىك پروبلەمالاردى شەشۋگە بولادى. اتاپ ايتقاندا, ورتاشا ءومىر ءسۇرۋ ۇزاقتىعىن ۇلعايتۋ, اۋرۋلاردىڭ الدىن الۋ, ەڭ باستىسى, دەنە شىنىقتىرۋ مەن سپورتتى دامىتۋ – بۇل ۇلتتىڭ بولاشاعىن جاقسارتادى.
كەلەسى جىلدان باستاپ مەملەكەتتىك بيۋدجەتتەن وليمپيادا ويىندارىنىڭ بارلىق تۇرلەرىنەن سپورتشىلاردى دايارلاۋ ءۇشىن «وليمپيادالىق دايارلىق ورتالىقتارىنا» جەتكىلىكتى قارجى ءبولۋ قاجەت. دەنە شىنىقتىرۋ ساباقتارىنىڭ ساعاتىن كوبەيتۋ كەرەك.
بارلىق ايماقتاردا, اسىرەسە, اۋىلدىق جەرلەردە جەكە سپورت باسقارمالارىن قۇرۋدى دا ۇسىنار ەدىم. اۋىلدىق جەرلەردە جىل بويى جۇمىس ىستەيتىن سپورت عيماراتتارىن, ساپالى قۇرال-جابدىقتارمەن قامتىلعان دەنە شىنىقتىرۋ كەشەندەرىن سالۋىمىز كەرەك. سپورت ينفراقۇرىلىمىنىڭ شىعىسىنا بولىنەتىن قارجىنى كوبەيتىپ, «100 مەكتەپ» پەن «100 اۋرۋحانا» باعدارلاماسى سەكىلدى 100 دەنە شىنىقتىرۋ كەشەندەرىن سالۋدى قولعا الساق, ءتىپتى جاقسى بولار ەدى.
ايسۇلتان جاقىپبەكوۆ, ارداگەر ۇستاز, كسرو سپورت شەبەرى:
جاسىراتىنى جوق, ورتا مەكتەپتەردەگى دەنەشىنىقتىرۋ ساباعىن وقىتۋدا ولقىلىقتار كوپ. بۇل ءپاندى الاڭعا شىعىپ دوپ تەبۋ عانا دەپ تۇسىنبەۋ كەرەك.
الەم چەمپيوندارى مەن وليمپيادا ويىندارىنىڭ ءبارى مەكتەپ قابىرعاسىنان باستاپ قالىپتاسۋى كەرەك. ول ءۇشىن, ارينە, دەنەشىنىقتىرۋ پانىنە ءمان بەرۋ كەرەك. بۇل ماسەلە جاقىندا پارلامەنت قابىرعاسىندا كوتەرىلدى. وتە قۇپتارلىق باستاما. مەكتەپ ءبىتىرۋشى تۇلەكتەر دە, جوعارى وقۋ ورنىنىڭ ستۋدەنتتەرى دە سپورتتان سىناق تاپسىرسا ارتىق ەتپەيدى. ولاردىڭ بارىنەن وليمپيادا چەمپيوندارى شىقپاعان كۇننىڭ وزىندە ءبىز وسى باستامانى جۇزەگە اسىرۋ ارقىلى ۇلت دەنساۋلىعىن جاقسارتۋعا قول جەتكىزە الامىز. بۇگىندە باس قالامىزدا سپورتپەن اينالىسامىن دەگەن ادامعا بارلىق جاعداي جاسالعان.
