ارداگەرلەر ەڭبەگى – ەل يگىلىگىنە
ەسىل اۋداندىق ارداگەرلەر كەڭەسىنىڭ ۇيىمداستىرۋىمەن «قازاقستانداعى ەكونوميكالىق رەفورمالاردىڭ ەۆوليۋتسياسى» تاقىرىبىندا دوڭگەلەك ۇستەل ءماجىلىسى ءوتتى. تاۋەلسىزدىكتىڭ 25 جىلدىعى مەن قر كونستيتۋتسياسى كۇنىنە ورايلاستىرعان القالى جيىنعا 70-تەن اسا ارداگەر قاتىستى.
شارا بارىسىندا قر پرەزيدەنتى جانىنداعى مەملەكەتتىك باسقارۋ اكادەمياسىنىڭ پروفەسسورى, ەكونوميكا عىلىمدارىنىڭ دوكتورى ءباتيما مۇقاشەۆا جينالعاندارعا مەملەكەتىمىزدىڭ ەكونوميكالىق ساياساتى جونىندە بايانداما وقىدى. 1989-1999 جىلداردى ءتورت ەكونوميكالىق كەزەڭگە ءبولىپ قاراستىرعان پروفەسسور ءارى قاراي وسى سالاداعى مەملەكەتتىڭ ءساتتى قادامدارىنا توقتالدى. سونداي-اق ەلباسىنىڭ «نۇرلى جول – بولاشاققا باستار جول» اتتى جولداۋىنىڭ ءمان-مازمۇنى جان-جاقتى تالدانىپ, سول بويىنشا اتقارىلعان جۇمىستاردىڭ بىرقاتارى تالقىلاندى. ارداگەرلەر بۇل كۇنى وزدەرىن مازالاعان سۇراقتارعا بىلىكتى ماماننىڭ جاۋاپتارىن ەستىپ قۋاندى.
– كسرو ىدىراعان كەز ەسىمىزدە. دۇكەن سورەلەرى قاڭىراپ بوس قالعان, جۇمىس جوق. ناعىز توقىراۋ جىلدارى ەدى. سودان بەرى ءبىز حالىق بىرلىگىنىڭ بەرىك ۇلگىسىن تانىتتىق. تاۋەلسىزدىكتىڭ ءۇشىنشى ونجىلدىعىنا اياق باستىق. ەندى بارشا ەلدىڭ الدىندا جاڭا ماقسات-مىندەتتەر تۇر. داعدارىس كەزىندە بىردە-ءبىر مەملەكەت الەۋمەتتىك تولەمدەرىن كوبەيتە الماعان بولسا, ءبىزدىڭ قازاقستان وسىنداي ناقتى قادامدارعا سەنىممەن باردى. ەلىمىزدىڭ اتا بۋىنى, ياعني ۇلى وتان سوعىسىنىڭ ارداگەرلەرى بەيبىتشىلىكتى ساقتادى. تىلداعى مايدانگەرلەر ەڭبەگى جەڭىسكە جەتەلەدى. ال بۇگىندە ءبىز جاستارىمىزعا مول تاجىريبەمىزدى ۇيرەتىپ, پاتريوتتىق رۋحتاعى قىزمەتىمىزدى جالعاستىرىپ كەلەمىز. بار ءبىلىم مەن كۇش-جىگەرىمىزدى مەملەكەتىمىزدىڭ وركەندەۋىنە جۇمسادىق, ەل يگىلىگىنە ۇلەس قوسۋعا ارقاشان دايىنبىز, – دەدى شارا سوڭىندا ەسىل اۋداندىق ارداگەرلەر كەڭەسىنىڭ ءتوراعاسى رىستى اتىعاەۆا.
ءمادينا جاقىپ