استانادا «جاس سارباز» پاتريوتتاردى تاربيەلەيدى» اتتى ءىس-شارا ۇيىمداستىرىلدى.
استانا قالالىق ارداگەرلەر كەڭەسى, ەسىل اۋداندىق «بەلسەندى ۇزاق ءومىر ءسۇرۋ ورتالىعى» جانە №89 مەكتەپ-ليتسەيى ۇيىمداستىرعان تاعىلىمدى ءىس-شارادا «ارداگەرلەر ۇيىمى» رەسپۋبليكالىق قوعامدىق بىرلەستىگى توراعاسىنىڭ ورىنباسارى كوپبەرگەن بەكماعانبەت, «بەلسەندى ۇزاق ءومىر ءسۇرۋ ورتالىعى» مكم ديرەكتورىنىڭ ورىنباسارى مارات اۋباكىروۆ, استانا قالاسى قورعانىس ىستەرى دەپارتامەنتىنىڭ ۋاكىلى عاني ارتىقوۆ, «امانات» پارتياسى ساياسي جۇمىستار دەپارتامەنتى باستىعىنىڭ ورىنباسارى ەركەبۇلان جاۋلىباەۆ, جۋرناليست, اۋدارماشى, ۆەلوساياحاتشى, 55 كۇندە 5555 شاقىرىمدى ەڭسەرگەن ەرنات مەلسۇلى, اۆياتسيا ارداگەرى مارال سەرىكباەۆا جينالعان جاسوسپىرىمدەر الدىندا وي-پىكىرىمەن ءبولىستى. وتاندىق پاتريوتيزم تۋرالى تاعىلىمدى سوزدەرىن ايتتى.
كەزدەسۋگە كەلگەن جاسوسپىرىمدەر اسىرەسە اۆياتسيا ارداگەرى مارال سەرىكباەۆا مەن ساياحاتشى ەرنات مەلسۇلىنىڭ عيبراتتى دا قىزىقتى اڭگىمەلەرىن ىقىلاسپەن تىڭدادى.
تاعىلىمدى ءىس-شارا بارىسىندا «جاس سارباز» قوزعالىسىنىڭ جۇمىسىنا جاقسى باعا بەرىلدى. اعا ۇرپاق وكىلدەرى اقىل-كەڭەسىن ايتتى. سونداي-اق پاتريوتتىق تاقىرىپتا سۇراق-جاۋاپ ۆيكتوريناسى ۇيىمداستىرىلدى. ال ەسىل اۋدانى ارداگەرلەرىنىڭ «ەسىل تولقىندارى» حالىق ءانسامبلى مەن №89 مەكتەپ-ليتسەي وقۋشىلارى ورىنداعان بىرنەشە پاتريوتتىق اندەر كەزدەسۋدىڭ ءمان-ماعىناسىن اشا ءتۇستى.
ەڭ باستىسى – ارداگەرلەر مەن جاسوسپىرىمدەردىڭ كەزدەسۋىندە وتاندىق ءپاتريوتيزمنىڭ ۇرپاقتان-ۇرپاققا جالعاسىپ جاتقانى اڭعارىلدى.
