استانا قالاسى اكىمدىگىنىڭ ە.راحماديەۆ اتىنداعى مەملەكەتتىك اكادەميالىق فيلارمونيانىڭ باس ديرەكتورى ەرلان داكەنوۆ ونەر ۇجىمى ارداگەرلەرىنە قۇرمەت كورسەتتى. كوپتى كورگەن تاجىريبەلى ازاماتتارمەن كەڭەسىپ, مادەني وشاقتىڭ الداعى جوسپارلارىن ايتتى.
– ەلوردامىزدىڭ مۋزىكالىق جۇرەگىنە اينالعان فيلارمونيا وزدەرىڭىزدىڭ سارا ەڭبەكتەرىڭىزبەن قۇرىلىپ, بۇگىنگى كۇنى ەلىمىزدىڭ بەتكەۇستار مادەني وشاعىنا اينالدى. سىزدەر ورەلى ونەرمەن سۋسىنداتىپ, رۋحاني بايلىقتى تولىقتىرۋعا جانە يگى داستۇرلەردى جالعاستىرۋدا ايانباي ەڭبەك ەتتىڭىزدەر. سودان بەرى جەتكەن جەتىستىكتەرىمىز بەن باعىندىرعان بەلەستەرىمىز كول-كوسىر. نەبىر ءدۇلدۇل جىرشى-تەرمەشىلەر, كۇمىس كومەي انشىلەر, داۋلەسكەر كۇيشىلەر, ساڭلاق بيشىلەر شىڭدالىپ, ونەر بيىگىنەن كورىندى. بۇگىنگى تاڭدا ەركەعالي راحماديەۆ اتىنداعى مەملەكەتتىك اكادەميالىق فيلارمونياسى 13 شىعارماشىلىق ۇجىمنان تۇرادى. سىزدەر ونەگەلى وشپەس ءىز قالدىرعان ۇلكەن مادەنيەت ورداسىنا 2021 جىلى كورنەكتى كومپوزيتور ەركەعالي راحماديەۆتىڭ ەسىمى بەرىلدى, – دەدى فيلارمونيا باس ديرەكتورى.
فيلارمونيا ارداگەرلەرى قاتارىندا بۇگىندە ءالى دە ساپتان شىقپاي, قازاق وركەسترىنە جەتەكشىلىك ەتىپ كەلە جاتقان كۇيشى-كومپوزيتور, ديريجەر, قازاقستاننىڭ ەڭبەك سىڭىرگەن قايراتكەرى ايتقالي جايىموۆ, بەلگىلى مۋزىكانت, قاز قسر ەڭبەك سىڭىرگەن ءارتىسى بەكبولات بايساعاتوۆ, بەلگىلى ءبيشى, ۇستاز, قازاقستاننىڭ ەڭبەك سىڭىرگەن ءارتىسى تويعان ءىزىم, ءانشى قياقباي اسامباەۆ, ت.ب. بار.
