استانا كۇنى قارساڭىندا ۇيىمداستىرىلعان ايتۋلى ءىس-شارالار بارشىلىق. ءتۇرلى بايقاۋلاردا بابى كەلىسسە دە, باعى جانباي قالعان ۇمىتكەرلەر مويىعان جوق. قۇلادى, ءجۇردى. جىلادى, كۇلدى. قۇلاۋى مەن جىلاۋىنا سىن ساعاتتاعى ساتسىزدىك, ءجۇرۋى مەن كۇلۋىنە ەلوردا تويىنىڭ ەرەكشەلىگى سەبەپشى بولدى. تارتۋى كوپ تويعا ءتانتى بولىپ, تاۋبە ەتۋدەن باسقا نە كەرەك؟!.
مامانداردى مارقايتقان بايىپتى بايقاۋ – امەريكالىق «گرەممي» سىيلىعى ۇلگىسىندە وتكەن «استانا جۇلدىزى» ۇلتتىق مۋزىكالىق بايگەسى بولدى. وتاندىق كاسىبي مۋزىكانتتاردىڭ 2012 جىلدىڭ قاڭتارىنان 2013 جىلدىڭ مامىرىنا دەيىنگى شىعارماشىلىق جەتىستىكتەرىن ساراپقا سالعان اتاۋلى سىيلىققا استانا قالاسى اكىمدىگىنىڭ ءوزى باستاماشى بولعاندىقتان, سايدىڭ تاسىنداي ساراپشىلار دا اردان اتتاپ, ابىرويدى تاپتاعان جوق. ولار ءانشىنىڭ ءۇنتاسپاسى ساقتالعان ارنايى داۋىس بەرۋ پاراقشاسىن جاساقتاپ, 15 جىلدىقتا 15 نوميناتسيا بويىنشا 15 ۇزدىكتى انىقتادى.
«قازاقستان» ورتالىق كونتسەرت زالىندا جايىلعان قىزىل كىلەمشە ۇستىمەن ءجۇرىپ وتكەن كىل مىقتىنىڭ ىشىنەن ءبىر مىقشەگەنىڭ شىقپاۋى استە مۇمكىن ەمەس. سوندىقتان جالپى 45 قاتىسۋشىدان جالقى 15 جەڭىمپازدىڭ ىرىكتەلىپ الىنۋى – زاڭدىلىق. اسىرەسە, ۇلتتىق اۋەندەرگە اسا كوڭىل ءبولىنىپ, تۋىندىلاردى باعالاۋدا World Music Awards ونەر دوداسىنىڭ تەحنولوگياسى قولدانىلدى. سودان سۇرىنبەگەن مارجان اراپباەۆا «قىزدار اراسىنداعى ۇزدىك ورىنداۋشى» اتالىمىنا لايىق دەپ تانىلسا, «ۇزدىك كومپوزيتوردا» – تالعات سارىباەۆ, «جاڭا تىنىس» اتالىمىندا – ءالي وقاپوۆ, «ۇزدىك دۋەتتە» – «ميۋزيكولا», «ۇزدىك ەتنو-توپتا» – «ۇلىتاۋ», «ۇزدىك ايەلدەر توبىندا» – «كەش you», «ۇزدىك ەرلەر توبىندا» – «مۋزارت» جەڭىمپاز بولدى. ال, «جىگىتتەر اراسىنداعى ۇزدىك ەسترادا ورىنداۋشىسى» – جۇبانىش جەكسەنۇلى, «ۇزدىك وڭدەۋشى» – ۆيكتور الەنكو, «ۇزدىك ءماتىن اۆتورى» – فاريزا وڭعارسىنوۆا, «ۇزدىك كونتسەرتتىك شوۋ» – روزا رىمباەۆا, «ەڭ ءستيلدى ءانشى» – ليدو, «ۇزدىك بي توبى» – «ۆيۆات» توبى دەسەك, «مۋزارت» ورىندايتىن «قازاقتاي ەل قايدا» ءانى «جىل ءانى» رەتىندە العا شىقتى. ءوز كەزەگىندە «حيتتۆ» تەلەارناسى دا «وردا» توبىنا ارنايى سىيلىق پەن ارنادا تەگىن روتاتسيا جاساۋ مۇمكىندىگىن بەردى.
مۋزىكا سىيلىعىن تاپسىرۋ كەزىندە «قازاقستان» ورتالىق كونتسەرت زالى ساحناسىندا وتاندىق ەسترادا انشىلەرى مارجان اراپباەۆا, نۇرلان ابدۋللين, تولقىن زابيروۆا جانە «وردا», «كەش you», «Ringo», «مۋزارت» توپتارى ونەر كورسەتتى. ال, گالا-كونتسەرت حەدلاينەرى رەتىندە ارنايى شاقىرىلعان, الەمگە ايگىلى ءانشى دجامالا تەڭدەسسىز تالانتىمەن قايتالانباس مۋزىكا مەرەكەسىن اسقاقتاتا ءتۇستى.
ەركەعالي بەيسەنوۆ
