جيرەن ساقالدى, ۇزىن بويلى شەنەۋنىك بايانداما جاساپ تۇر.
«قازاق «ايەلدىڭ قىرىق جانى بار» دەيدى. سوندىقتان, ولاردىڭ قىرىق جانىن قىرىق جىل جۇمىس ىستەۋگە جۇمسايتىن قىلدىق. قازاق جانە ايتادى, «ايەلدىڭ الپىس ەكى ايلاسى بار» دەپ. دەمەك, ءار جىلدا ءبىر ايلادان كەمىپ وتىرسا, ءبارىن قۇرتۋعا الپىس ەكى جىل كەتەدى. سونى ەسكەرىپ, ءبىز ايەلدەردى زەينەتكە الپىس ءۇش جاسىندا شىعاراتىن بولدىق. قازاقستاندىق ايەلدەردىڭ زەينەت جاسىن ۇزارتۋىمىزعا ءوز اتا-بابالارىنىڭ وسى ەكى ءسوزى دالەل بولدى. جانى قالماي جۇمىس جاساپ, امال-ايلاسى تاۋسىلعان كەزدە زەينەتاقى الاتىن بولسا, تاماشا ەمەس پە؟! بۇل شەشىمدى كەڭسەدەگى جىگىتتەرمەن اقىلداسا وتىرىپ شىعاردىق. قاتىنى بارلار قارسى بولمادى…».
وعان لاقتىراتىن جۇمىرتقا الا بارماق بولعان پيعىلىمدى حوش كورمەگەن قورازىمنىڭ ءوزى جۋىق ارادا تاۋىقتارعا جولايتىن ءتۇر بايقاتپاي, ءبىراز شىداپ باقتى.
بىراق, ءبىر قاسقا باس جىگىت مەنىڭ ىستەمەگىنىمدى ىستەدى. شاماسى, بويداق بولسا كەرەك… جيرەن ساقالدى, ۇزىن بويلى شەنەۋنىك قاتىسپاعان كەلەسى كەزدەسۋدە الگى باياندامانى قايتالاعان جاس بيشىگەشكە قوس جۇمىرتقانى قاتار لاقتىردى. قوس جۇمىرتقا بولعاندا, نە عوي… تاۋىقتىڭ جۇمىرتقاسى عوي! جاس شەنەۋنىكتىڭ قىمبات كاستومىن ۇرىعىمەن بىلعاعان قورازىندا دا ۇيات جوق ەكەن. ءدال سول كۇنى تاۋىقسىز دا تاڭ اتىرۋىنا بولۋشى ەدى. ويتپەدى.
تەلەديداردى قوسىپ قالسام, جيرەن ساقالدى, ۇزىن بويلى شەنەۋنىك تاعى سويلەپ تۇر: «مەن ءۇشىن تۋىلعان جۇمىرتقا اناۋ «پاتامۋشتا, پاتامۋشتا» دەيتىن جاس ءىزباسارىمىزدىڭ ۇستىنەن تابىلىپتى. زەينەتكە تۇك قاتىسى جوق تاۋىقتاردىڭ بۇل نارازىلىعىنا, جۇمىرتقالارىنىڭ شەرۋىنە ءۇزىلدى-كەسىلدى قارسىمىن!..».
بۇنىسىن قازاقستانعا اكەلىنگەن تۇيەقۇستار ەستىمەسىن دەڭىز…
ەركەعالي بەيسەنوۆ
