استانا كوكتەمىندەگى كەش

بۇگىن «استانا وپەرا» مەملەكەتتىك وپەرا جانە بالەت تەاترىنىڭ ۇلكەن زالىندا حالقىمىزدىڭ كۇمىس كومەي, جەزتاڭداي ءانشىسى, قازاقستاننىڭ ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى مايرا مۇحامەدقىزىنىڭ «شىرقار ءانىم – استانا كوكتەمى» اتتى كونتسەرتى وتەدى.

وپەرا جۇلدىزى بەي­جىڭ, گونكونگ, پاريج, ىس­تامبۇل, دەلي, سەۋل جانە الەمنىڭ باسقا دا كوپتەگەن قالالارىنىڭ ايگىلى ساحنالارىندا ءان شىرقاعان. پ.چايكوۆسكي اتىنداعى حI حالىقارالىق كونكۋرسىندا توپ جارىپ, جەڭىمپاز اتانعان.

ساحناعا ونىمەن قاتار تانىمال انشىلەر قازاق­ستاننىڭ ەڭبەك سىڭىرگەن قاي­راتكەرلەرى نۇرلان بەك­مۇحامبەتوۆ, دينا حامزينا, مەدەت شوتاباەۆ, سۇندەت بايعوجين شىعادى. سونداي-اق, رامزات بالاكيشيەۆ پەن تالعات عالەەۆ بىرىگىپ اريالار, دۋەتتەر جانە قازاقتىڭ حالىق اندەرىن ورىندايدى. كونتسەرتكە بالەت ارتىستەرى جانە «استانا وپەرا» حورى مەن سيمفونيالىق وركەسترى قاتىسادى. قازاقستاننىڭ ەڭبەك سىڭىرگەن قايراتكەرى ابزال مۇحيتدينوۆ ديري­جەرلىك ەتەدى.

ساحنادا 20 جىل بويى ءان شىرقاپ كەلە جاتقانىن ايتقان ءانشى بۇگىندە ءوزى ارمانداعان رولدەرىنىڭ بارلىعىن ورىنداپ شىققانىن ايتادى. دەگەنمەن, ءالى دە ارماندارى بار ەكەن. ول – كوۆەنت-گاردەن, مەتروپوليتەن وپەرا سىندى الەمگە ايگىلى تەاترلاردا ونەر كورسەتۋ.

– بۇل كونتسەرت – شى­عارماشىلىقتى قورىتىن­دىلاۋ ەمەس, تەك جاڭا بە­لەستىڭ باستاۋى. قازاقستان پرەزيدەنتى نۇرسۇلتان نازارباەۆ سىيلاعان تاماشا «استانا وپەرا» تەاترىندا مەنىڭ ەكىنشى تىنىسىم اشىلعانداي. 22 ناۋرىزدا مەن ءوز حالقىما جاڭا ۇجىممەن بىرلەسىپ دايىنداعان باع-دارلامانى ۇسىنامىن. كونتسەرتكە دايىندىق كەزىندە كونتسەرتمەيستەرىم ەلەنا ساحنومەن كوپ جانە تاباندى جۇمىس ىستەدىك. ۆوكالدىق شەبەرلىكتى ۇشتاپ, كەيبىر ەرەكشەلىكتەرىن جاقسىلاپ پىسىقتادىق. وسى كەشتەن تىڭدارمان ناعىز ءلاززات العانىن قالايمىن, – دەيدى مايرا مۇحامەدقىزى.

ءاز-ناۋرىز مەرەكەسىنە ارنالاتىن كونتسەرت ەكى بولىمگە ءبولىنىپ وتەدى. باستالۋى – 18.00.

امانعالي قالجانوۆ

astana-akshamy.kz