ۆەلوسپورتتان 22 كۇنگە سوزىلعان جىلدىڭ ەڭ ۇلكەن ءتۋرنيرى «تۋر دە فرانس – 2016» كوپكۇندىگى اياقتالدى. 2-ءشى شىلدە كۇنى فرانتسيانىڭ مون-سەن-ميشەل قالاسىنان باستالعان ۆەلوكوپكۇندىك 24 شىلدە كۇنى فرانتسيا استاناسى پاريج قالاسىندا ءوز مارەسىنە جەتتى. بۇل باسەكەگە ەلىمىزدىڭ «استانا» ۆەلوكومانداسى دا قاتىستى. بيىلعى جارىسقا كلۋب باسشىلارى ەكى يتاليالىق ليدەر – ۆينچەنتسو نيبالي مەن فابيو ارۋدى بىردەي قوستى. دەگەنمەن, كاپيتاندىق مىندەت ارۋعا جۇكتەلدى. سەبەبى, «تۋر دە فرانس-2014» جارىسىنىڭ جەڭىمپازى ۆينچەنتسو نيبالي «دجيرو د’يتاليا-2016» تۋرنيرىنە قاتىسىپ, كۇشىن سارقىپ العان سوڭ نەگىزگى جۇك فابيوعا ءتۇستى.
2015 جىلى يسپانيا تاس جولدارىندا وتكەن «ۆۋەلتا» كوپكۇندىگىنىڭ جەڭىمپازى فابيو ارۋ «تۋر دە فرانس» جارىسىنا بيىل العاش رەت قاتىسقانىنا قاراماستان 20-كەزەڭگە دەيىن ۇزدىك وندىقتىڭ ىشىندە ءجۇردى. ءتىپتى, 18-ءشى كەزەڭدە مارە سىزىعىن ءۇشىنشى بولىپ كەسكەنىن دە ايتا كەتكەن ءجون. سوڭعى 2 تۋردا ارۋ ازداپ بوساڭسىپ, ليدەردەن اراقاشىقتىعىن 19 مينۋتقا سوزىپ الدى. ناتيجەسىندە, فابيو ارۋ باسەكەنى 13-ءشى ورىنمەن اياقتادى. ول تۋرنير جەڭىمپازى بريتانيالىق كريس فرۋمنان 19 مينۋت 20 سەكۋندقا قالىپ قويدى. «تۋر دە فرانستىڭ» 2014 جىلعى جەڭىمپازى نيبالي بولسا جالپى ەسەپتە 30-ورىننان كورىندى. ال, جارىسقا قاتىسقان «استانا» كومانداسىنىڭ قالعان وكىلدەرىنىڭ ناتيجەسى مىناداي: تانەل كانگەرت (26), ديەگو روسا (37), لۋيس لەون سانچەس (48), ياكۋب فۋلسانگ (52), الەكسەي لۋتسەنكو (62), پاولو تيرالونگو (74) جانە اندرەي گريۆكو (86) ورىن.
جالپى كوماندالىق ەسەپتە «استانا» كومانداسى 5-ورىن يەلەندى. جاس سپورتشىلار اراسىندا قازاقستاندىق ۆەلەوسپورتشى الەكسەي لۋتسەنكو 9-شى ورىن السا, تاۋلى كەزەڭ بويىنشا ۆيچەنتسو نيبالي 36 ۇپايمەن 8-ورىندى مىسە تۇتتى.
ءالي بيتورە
