ەرتەڭ فۋتبولدان ەۋروپا چەمپيوندار ليگاسىنىڭ ءۇشىنشى ىرىكتەۋ كەزەڭىنىڭ العاشقى ويىندارى باستالادى. ءۇشىنشى ەلەكتىك كەزەڭدە ەلىمىزدىڭ اتىنان سىنعا ءتۇسىپ جاتقان ەلوردانىڭ «استانا» كلۋبى شوتلانديالىق «سەلتيككە» قارسى وينايدى. قوس قۇراما اراسىنداعى العاشقى ويىن 27-ءشى شىلدە كۇنى استاناداعى «استانا ارەنا» ستاديونىندا وتەدى.
«سەلتيك» كلۋبى قازاقستاندىق جانكۇيەرلەرگە جاقسى تانىس بولۋى كەرەك. سەبەبى, 2013-ءشى جىلعى چل ءتۋرنيرىنىڭ پلەي-وفف راۋندىندا قاراعاندىلىق «شاحتەر» كومانداسىمەن ويناعان بولاتىن. ەكى ويىننىڭ قورىتىندىسى بويىنشا «سەلتيك» 3:2 ەسەبىمەن جەڭىسكە جەتكەن ەدى. ەندى قازاقستاندىق جانكۇيەرلەر «شاحتەر» جىبەرگەن ەسەنى ەلوردالىق «استانا» كلۋبىنىڭ قايتاراتىنىنا سەنەدى.
«سەلتيك» كلۋبى 1887 جىلى قۇرىلىپ, بۇگىنگە دەيىن شوتلانديا چەمپيوناتىندا 47 رەت جەڭىمپاز اتانعان. 1966/67 جىلى ەۋروپا كۋبوگى چەمپيوناتىندا (قازىرگى چەمپيوندار ليگاسى – رەد) چەمپيون بولعان. سونداي-اق, 2002/03 جىلعى ۋەفا كۋبوگىنىڭ فينالىنا دەيىن جەتكەن. قازىرگى تاڭدا كلۋبتى 2012/15 جىلدارى انگليانىڭ «ليۆەرپۋل» كومانداسىن باپتاعان برەندان رودجەرس جاتتىقتىرادى. 2015/16 جىلعى ۋەفا رەيتينگىندە «سەلتيك» كلۋبى 40-ورىندا بولسا, «استانا» كومانداسى 96-ورىنعا جايعاسقان.
ويىن الدىندا مىناداي ستاتيستيكالىق مالىمەتتى نازارلارىڭىزعا ۇسىنعاندى ءجون كورىپ وتىرمىز. «استانا» فۋتبول كلۋبى ۋەفا چەمپيوندار ليگاسىنىڭ ءوز الاڭىندا وتكەن ويىندا ءبىر رەت بولسىن جەڭىلىپ كورمەگەن. بىلتىردان بەرى وسى تۋرنير اياسىندا 7 ويىن وتكىزىپ, ەشبىرىندە جەڭىلمەگەن. ءتىپتى, چەمپيوندار ليگاسىنىڭ فينالىنا دەيىن جەتكەن يسپانيالىق «اتلەتيكو مادريد» كلۋبىمەن توپتىق كەزەڭدە تەڭ تۇسكەنىن جانكۇيەرلەر ءالى ۇمىتا قويماعان بولار. «استانا» كومانداسى بۇل جولى دا جەڭىستى جولىن جالعاستىرادى دەپ سەنەمىز.
«استانا»-«سەلتيك» اراسىنداعى قارىمتا ويىنى 2 تامىز كۇنى شوتلاندياداعى «سەلتيك پارك» ارەناسىندا وتەدى.
ءالي بيتورە
