كەشە «اتامەكەن» قازاقستان كارتاسى» ەتنومەموريالدىق كەشەنىنىڭ ون ءۇش جىلدىق مەرەيتويىنا وراي «قازاعىمنىڭ التىن ۇياسى – اتامەكەن» اتتى دوڭگەلەك ۇستەل وتىرىسى ءوتتى. جيىنعا پارلامەنت ءماجىلىسىنىڭ بىرقاتار دەپۋتاتتارى, ەلورداداعى زيالى قاۋىم وكىلدەرى جانە مادەنيەت, ونەر قايراتكەرلەرى قاتىستى.
باسقوسۋدى مۇراجاي ديرەكتورى الما التىباەۆا ءسوز سويلەپ اشىپ, كوپشىلىكتى مەرەكەمەن قۇتتىقتادى. «ەلباسى نۇرسۇلتان نازارباەۆتىڭ باستاماسىمەن اشىلعان بۇل كەشەن ەكى گەكتار جەردى الىپ جاتىر. مۇندا ەلىمىزدىڭ تاريحىمەن دە, مادەنيەتىمەن دە تانىسۋعا مۇمكىندىك بار. مۇراجاي جادىگەرلەرىنىڭ قاتارىنا جىل سايىن ءار وڭىردەگى جاڭا نىسانداردىڭ ماكەتى قوسىلىپ وتىرادى. سونىمەن قاتار, ءار ءوڭىردىڭ كەشەگىسىن ايشىقتايتىن ەسكەرتكىشتەردىڭ ءوزى ۇلكەن ماڭىزعا يە ەكەنىن ايتۋىمىز كەرەك.
مەرەيتويىمىزعا وراي, استانالىقتار اراسىندا پاتريوتتىق, وتانسۇيگىشتىك سەزىمدى قالىپتاستىرا ءتۇسۋ ماقساتىمەن ءتۇرلى شارالارعا ۇيىتقى بولۋدى جوسپارلاپ وتىرمىز. مۇراجاي تورىنەن «قازاق ءۇيىن» اشۋىمىز وسى ءسوزىمنىڭ كۋاسى دەر ەدىم. سونداي-اق, ءاربىر قوناعىمىزعا ۇلتتىق تاعامدارىمىزدان ءدام تاتۋعا دا جاعداي جاساماقپىز. ءۇش جىلدان كەيىن ەلوردادا وتەتىن «ەكسپو» حالىقارالىق كورمەسىنە ارناپ پاۆيلون اشۋ دا ويىمىزدا بار» دەدى الما قۋاندىققىزى.
جيىن بارىسىندا اقىن, ساكەن سەيفۋللين مۇراجايىنىڭ ديرەكتورى نەسىپبەك ايتۇلى, ساتيريك كوپەن امىربەك, ءماجىلىس دەپۋتاتى گالينا بايمۇقانوۆا جانە باسقا دا قوناقتار ءسوز سويلەپ, «اتامەكەن» كەشەنىنىڭ قازىرگى قوعامداعى مادەني-رۋحاني ماڭىزى, جايىندا ويلارىن ءبىلدىردى. كوپشىلىك ۇلكەن ەكراننان اشىق اسپان استىنداعى مۇراجايدىڭ تىنىس-تىرشىلىگىنە ارنالعان بەينەروليكتى تاماشالادى.
دوڭگەلەك ۇستەل وتىرىسى «قازاق ءۇيى» اتتى ەتنو-اۋىلدىڭ اشىلۋ سالتاناتىمەن جالعاستى. ءۇيدىڭ ءىشى ۇلتتىق جادىگەرلەرمەن تولتىرىلعان. استانا قالاسى سۋرەتشىلەر وداعىنىڭ جاڭا نىسانعا ارناپ ۇيىمداستىرعان «قازاعىم – ۇلى ەلىم» اتتى كورمەسى دە ايرىقشا اسەر سىيلايدى. ونداعى كارتينالار حالىق تاريحى مەن شەجىرەسىن, بولمىسى مەن قۇندىلىعىن كوركەم بەينەلەرمەن اسپەتتەيدى.
مەرەكەلىك شارالار سوڭىندا كوپشىلىك مۇراجايعا ەكسكۋرسيا جاساپ, كونتسەرتتىك باعدارلامانى تاماشالادى. سونىمەن قاتار, كەشەننىڭ بەلسەندى قىزمەتكەرلەرى مەن بىرقاتار باق وكىلدەرىنە العىس حاتتار تابىس ەتىلدى.
اسحات رايقۇل
