قالالىق ىشكى ساياسات باسقارماسى مەن ىشكى ىستەر دەپارتامەنتى بىرلەسىپ مەكەمەلەردەگى مەملەكەتتىك رامىزدەردىڭ زاڭعا ساي قولدانىلۋى مەن ورنالاسۋىنا تەكسەرۋ جۇرگىزدى.
الدىمەن بارعان مەكەمەمىز – قر پرەزيدەنتى جانىنداعى مەملەكەتتىك باسقارۋ اكادەمياسى بولدى. بۇل مەكەمەنىڭ ءماجىلىس زالىندا ورنالاسقان ەلتاڭبانىڭ جاسالۋى بەلگىلەنگەن ستاندارتقا ساي بولماي شىقتى. ءارى رەكتوردىڭ كابينەتىندەگى مەملەكەتتىك تۋدى دا تەكسەرۋشىلەر دۇرىس ورنالاسپاعان دەپ تاپتى. مەكەمەنىڭ ءبىرىنشى باسشىسىنا ەسكەرتۋ حاتى بەرىلدى. اتالعان كەمشىلىكتەردى ولار ءبىر كۇننىڭ ىشىندە جوندەۋى ءتيىس. سەبەبى, ۇكىمەتتىڭ قاۋلىسى بويىنشا, ۇلتتىق ستاندارتتارعا سايكەس كەلمەيتىن قازاقستان رەسپۋبليكاسىنىڭ مەملەكەتتىك تۋى مەن ەلتاڭباسىن اۋىستىرۋ ءبىر جۇمىس كۇنىنىڭ ىشىندە جۇزەگە اسىرىلۋى كەرەك.
بۇدان كەيىن استانا قالاسى بويىنشا جىلجىمايتىن مۇلىك ورتالىعىنا جول تارتتىق. بۇل مەكەمەنىڭ ماڭدايشاسىندا تۇرعان ەلتاڭبانىڭ ءوڭى كەتىپ, مۇلدە قارايىپ كەتىپتى. ىشكى ساياسات باسقارماسىنىڭ ءبولىم باسشىسى گۇلجان ەلۋباەۆانىڭ ايتۋىنشا, ەلدىگىمىزدى ايشىقتايتىن مەملەكەتتىك رامىزدەرگە ءار ازامات, ءار مەكەمە قۇرمەتپەن قاراۋعا ءتيىس. ەگەر مەكەمەدە ىلىنگەن رامىزدەر بۇلىنسە, ءوڭى كەتسە, دەرەۋ جاڭاسىنا اۋىستىرىلۋى كەرەك. كونەرگەن نۇسقاسىن كورىنگەن جەرگە تاستاۋعا بولمايدى. قولدانىلعان مەملەكەتتىك تۋ اياق استىندا قالماس ءۇشىن ورتەۋ جولىمەن جويىلۋعا ءتيىس.
ال, ەسىل-باسسەيندىك ينسپەكتسياسى مەكەمەسىندەگى مەملەكەتتىك رامىزدەردى قولدانىلۋ بارىسى مۇلدەم زاڭعا سايكەس كەلمەيدى. ءتىپتى, مەكەمە باسشىسىنىڭ كابينەتىندە قويىلعان تۋدىڭ ءبىر جاعى عانا كوك بولىپ شىقتى.
زاڭ بۇزۋشىلىققا جول بەرگەن بارلىق مەكەمە باسشىلارىنا ارنايى ەسكەرتۋ جاسالىپ, حات جولداندى. ولار ءبىر جۇمىس كۇنىنىڭ ىشىندە اتالعان كەمشىلىكتى جويۋلارى كەرەك. ەگەر بۇل تالاپ ورىندالماسا, ماتەريال استانا قالاسىنىڭ سوتىنا جىبەرىلەدى. ەگەر زاڭ بۇزۋشىلىق راستالسا, مەكەمە 200 اەك-كە دەيىنگى مولشەردە ايىپپۇل تولەۋى مۇمكىن.
قىمبات نۇرعالي
