«ازيا جاڭعىرىعى» حالىقارالىق تسيرك فەستيۆالى تسيرك ونەرىنىڭ ورتالىعى رەتىندە مەرەكە كۇندەرى استانانىڭ ابىرويىن اسقاقتاتپاق.
ۇيىمداستىرۋشىلاردىڭ ايتۋىنشا, فەستيۆال باعدارلاماسى قازاقستاننىڭ حالىقارالىق دەڭگەيدەگى مادەني جەتىستىكتەرىنىڭ ءبىرى سانالادى. حالىقارالىق تسيرك فەستيۆالى اياسىندا استانالىق تسيرك قالا تۇرعىندارى مەن قوناقتارىنا تسيرك «جۇلدىزدارىنىڭ» جانە الەمدىك دەڭگەيدەگى ۇزدىك جۇرگىزۋشى ارتىستەردىڭ قاتىسۋىمەن بىرەگەي باعدارلاما ۇسىنۋدى جوسپارلاپ وتىر. بۇل رەسەي, يتاليا, بەلارۋس, گەرمانيا, لاتۆيا, ۋكراينا, وزبەكستان, قىتاي جانە قازاقستاننىڭ ۇزدىك تسيرك نومىرلەرىنىڭ جيىنتىعى بولماق.
فەستيۆال باعدارلاماسىندا اۋە گيمناستشىلارى, اتتراكتسيوندار, ەكزوتيكالىق جان-جانۋارلار, شەبەر جونگلەرلەر, اكروباتتار جانە سايقىمازاقتار بار.
قازىلار القاسىنىڭ قۇرامىنا يتاليا, بەلارۋس, ۋكراينا, گەرمانيا, قىتاي, جانە تمد ەلدەرىندەگى تسيرك ونەرىنىڭ تانىمال تۇلعالارى ەنگەن.
ال, ءوزىمىزدىڭ ەلوردالىق تسيرك قالا كۇنىنە جەكە توسىنسىي دايىنداۋدا.
ارەناعا شىعاتىن جانۋارلار قازىردىڭ وزىندە ەلورداعا جەتكىزىلىپ, تسيرك ۆولەرلارىنان ورىن تاپقان. دجەنني مەن ماگگا اتتى قوس ءپىلدى 20 جىلعا جۋىق سەرىك ەتىپ, الەمدى ارالاپ ونەر كورسەتىپ جۇرگەن سەرگەي گۋلەۆيچ فەستيۆال ءۇشىن ارنايى بەلورۋسسيادان كەلىپتى. بۇگىندە ول كۇنىنە 150 كەلى تاماق جەيتىن ءتورت اياقتى دوستارىن باپتاپ, فەستيۆالعا دايىندىققا كىرىسكەن.
گۇلميرا ايماعانبەت
