اۋداندار بيۋدجەتى ازايمايدى
قالالىق ءماسليحاتتىڭ بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسياسىنىڭ وتىرىسىندا 2015-2017 جىلدارعا ارنالعان بيۋدجەت جوباسىن تالقىلاۋ اياقتالدى.
الدىمەن استانا قالاسىنىڭ ەكونوميكا جانە بيۋدجەتتىك جوسپارلاۋ باسقارماسى باسشىسىنىڭ ورىنباسارى گۇلنار ءجۇسىپوۆا دەپۋتاتتاردىڭ قاراۋىنا باس قالاداعى ءۇش اۋداننىڭ; قارجى; ەكونوميكا جانە بيۋدجەتتى جوسپارلاۋ; سونداي-اق تەكسەرۋ كوميسسياسىنىڭ بيۋدجەت باعدارلامالارى اكىمشىلىكتەرىنىڭ الداعى ءۇش جىلعا ارنالعان بيۋدجەت جوبالارىن ۇسىندى. ودان ءارى ءسوز العان اۋدان اكىمدەرى ءوز اۋداندارىنا قاتىستى بىرقاتار پروبلەمالارعا توقتالدى.
الماتى اۋدانىنىڭ اكىمى بەكبول ساعىننىڭ ايتۋىنشا, بۇگىنگى تاڭدا وسى اۋداندا 578 اۋلا بولسا, قازىر ولاردىڭ ون پايىزعا جۋىعى كۇردەلى جوندەۋدى قاجەت ەتىپ وتىر.
بيىل بەس بالاباقشاعا كۇردەلى ءجوندەۋ جۇمىستارى جۇرگىزىلگەن. دەگەنمەن, مەكتەپكە دەيىنگى بالالار مەكەمەلەرىنىڭ جىل بويى پايدالانۋعا بەرىلۋىنە بايلانىستى الدىن الا بيۋدجەتتە قاراستىرىلاتىن اقشا جىل سوڭىنا تامان جەتپەي جاتادى. سونىمەن بىرگە اۋدان باسشىسى جاڭا كوشەلەردىڭ پايدا بولۋىنا بايلانىستى بيىل وتكەن جىلمەن سالىستىرعاندا جارىقتى پايدالانعاندارى ءۇشىن ءتولەماقى كولەمىنىڭ 25 پايىزعا ارتقانىن, سوندىقتان وعان دا قوسىمشا قاراجات قاجەت ەكەنىن ايتتى. جالپى, اتالمىش اۋداننىڭ اكىمدىگىنە الداعى ءۇش جىلعا 40 293,2 ملن تەڭگە قاراستىرىلسا, ونىڭ 12 489,8 ملن تەڭگەسى 2015 جىلعا جوسپارلانىپ وتىر. اۋدان اكىمدىگىنىڭ قىزمەتى نەگىزگى سەگىز باعدارلاماعا نەگىزدەلگەن.
كەلەر جىلى ەسىل اۋدانىندا 7 بالاباقشا پايدالانۋعا بەرىلەدى. بىراق, سوڭعى جىلدارى وسىنداي بالاباقشالاردى قابىلداپ العاندا, وندا بالالارعا قاجەتتى قاراپايىم زاتتار, ماسەلەن, ءتوسەنىش, ىدىس-اياق, ءتىپتى, ويىنشىق بولمايتىندىقتان, بيۋدجەتتە الدىن الا قاراستىرىلعان قاراجات كۇرمەۋگە كەلمەي قالادى. جاڭادان پايدالانۋعا بەرىلىپ جاتقان كوشەلەردىڭ ماسەلەسى دە كوپ قيىندىقتار تۋدىرۋدا. اۋدان باسشىسى ءسابيلا مۇستافينا الداعى ۋاقىتتا وسى ماسەلەلەردى ويلاسىپ شەشۋدى العا تارتتى.
قازىر بۇل اۋداندا 59 كوپقاباتتى تۇرعىن ءۇي سالىنىپ جاتىر. ولاردىڭ 24-ءى جىل سوڭىنا دەيىن پايدالانۋعا بەرىلەدى. ال, كوممەرتسيالىق تۇرعىن ۇيلەردىڭ اۋلالارىن بيۋدجەتتىك تۇرعىن ۇيلەردىكىمەن سالىستىرۋ قيىن. وسىعان وراي, اۋدان اكىمى كەز كەلگەن جۇمىستىڭ جۇيەلى ءجۇرگىزىلۋىن ۇسىندى.
الداعى ءۇش جىلعا جوسپارلانعان بيۋدجەتتىڭ ناقتى شىعىستار ەسەبىندە ەسەپتەلگەنى جونىندە ايتا كەلە, سارىارقا اۋدانىنىڭ اكىمى ەرماعانبەت بولەكپاەۆ اۋدانداعى نەگىزگى ماسەلەلەرگە توقتالدى. بۇگىنگى تاڭدا بۇل اۋداندا بارلىعى 706 اۋلا بولسا, الدىڭعى جىلى ولاردىڭ جيىرما ەكىسى, ءوتكەن جىلى الپىس التىسى اباتتاندىرىلعان. 2015 جىلى ون ءۇش اۋلانى اباتتاندىرۋ جوسپارلانىپ وتىر.
بايانداماشى اتاپ وتكەندەي, الداعى ءۇش جىل ىشىندە استانا اۋداندارىنا جىلداعىدان كوبىرەك اقشا بولىنگەلى وتىر. ول قامقورلىققا ءزارۋ ازاماتتارعا الەۋمەتتىك كومەك كورسەتۋگە, اۋدان اۋماعىنداعى ەلدىمەكەندەردى اباتتاندىرۋ مەن كوگالداندىرۋعا, كوشەلەردى جارىقتاندىرۋ مەن تۇرعىن الاپتاردا تازالىقتى قامتاماسىز ەتۋگە باعىتتالماقشى. وسى جانە وزگە دە ماسەلەلەردى ەسكەرە كەلە, تۇراقتى كوميسسيانىڭ ءمۇشەلەرى بيۋدجەتتىك باعدارلاما اكىمگەرلەرىنىڭ الداعى ءۇش جىلعا ارنالعان بيۋدجەتتىك جوبالارىن ماقۇلدادى.
گۇلبارشىن وكەشقىزى