ەلىمىزدە جىل سايىن 80 مىڭعا جۋىق تۇسىك جاسالادى ەكەن. بەدەۋلىكتىڭ بەلەڭ الۋىنىڭ باستى سەبەبى دە – وسى. قازاقستانداعى جۇپتاردىڭ 15-16 پايىزى بالا تۋعا قابىلەتسىز. سوندىقتان, ولار ءسابيلى بولۋدىڭ باسقا جولدارىن ىزدەستىرۋگە ءماجبۇر. بۇل تۋرالى ورتالىق كوممۋنيكاتسيالار قىزمەتىندە «وتباسىلىق قۇندىلىقتار جانە وتباسىن جوسپارلاۋ» تاقىرىبىندا وتكەن بريفينگتە قر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ رەسپۋبليكالىق ۇيلەستىرۋشىسى گۇل وماروۆا مالىمدەدى.
ءاربىر ادامعا وتباسىن قۇرىپ, ارتىنا ۇرپاق قالدىرۋ – پارىز. باقىتتىڭ تورەسى دە – بالا ءسۇيۋ. وكىنىشكە قاراي, مۇنداي باقىتقا قول جەتكىزە الماي جۇرگەن جۇپتار از ەمەس. جىل وتكەن سايىن بەدەۋلىك پەن بەلسىزدىك ماسەلەسى ۋشىعىپ بارا جاتقانى دابىل قاعارلىق. الايدا, ءسابيدىڭ ۇنىنە زار بولىپ جۇرگەن وتباسىلارعا مەملەكەت جاناشىرلىقپەن قاراپ, جىل سايىن 600 وتباسىعا ەكستراكورپورالدى ۇرىقتاندىرۋ جاساۋعا كۆوتا بولەدى ەكەن. گۇل وماروۆانىڭ ايتۋىنشا, سوڭعى ون جىلدا جاساندى تۇسىك جاساتۋ 3 ەسەگە ازايعانىمەن, بۇل ەۋروپا ەلدەرىمەن سالىستىرعاندا جوعارى كورسەتكىش. ايتالىق, شەت ەلدەردىڭ دامىعان ەلدەرىندە 1 مىڭ ايەلدىڭ 3-6-ۋى عانا جاساندى تۇسىك جاساتۋ تاسىلىنە جۇگىنسە, ەلىمىزدە مىڭ ايەلدىڭ 18-ءى ابورت جاساتادى ەكەن.
قازىرگى بالا تۋ جاسىنداعى ايەلدەردىڭ دەنساۋلىعىندا دا كىنارات كوپ. ال, ساۋ بالا تەك ساۋ انادان عانا تۋادى. سوندىقتان, قر دەنساۋلىق ساقتاۋ جانە الەۋمەتتىك دامۋ مينيسترلىگى ايەلدەردى جۇكتىلىككە دەيىن جان-جاقتى تەكسەرۋدەن وتكىزۋ تۋرالى شەشىم قابىلداپتى.
بريفينگتە الەۋمەتتىك جاعدايى تومەن وتباسىلار مەن وسىنداي جانۇيادا تاربيەلەنىپ جاتقان بالالاردىڭ ماسەلەسى دە ءسوز بولدى. قر ءبىلىم جانە عىلىم مينيسترلىگىنىڭ باسقارما باسشىسى گۇلناش قوشقاروۆانىڭ ايتۋىنشا, ەلىمىزدەگى بالالاردىڭ سانى 5 ميلليوننان اسادى. ولاردىڭ 2 ميلليونى بالاباقشا جاسىنداعى بالدىرعاندار بولسا, 2,5 ميلليونى – مەكتەپ جاسىنداعى جەتكىنشەكتەر. ال, 4 مىڭعا جۋىعى – وقيتىن جاستار.
بۇگىندە ىشكى ىستەر ورگاندارىندا 13 مىڭ وتباسى ەسەپتە تۇر. ولاردا 20 مىڭنان اسا بالا تاربيەلەنىپ جاتىر ەكەن. مينيسترلىكتىڭ باسقارما باسشىسى مۇنداي بالالاردىڭ ەشقايسىسى قاراۋسىز ەمەستىگىن, ولارمەن تىعىز جۇمىس ىستەۋدى ۇيىمداستىرۋ ءۇشىن ءبىلىم بەرۋ ۇيىمدارىندا 3,5 مىڭ الەۋمەتتىك پەداگوگ, 7,5 مىڭنان استام پسيحولوگ جانە 1,5 مىڭنان استام پوليتسيا ينسپەكتورى تارتىلعانىن اتاپ ءوتتى.
قىمبات نۇرعالي
