بالالار ەمحاناسى اشىلدى
كەشە استانادا №1 قالالىق بالالار اۋرۋحاناسىنىڭ بازاسىندا 125 كەلۋشىنى قابىلداي الاتىن مامانداندىرىلعان كلينيكالىق–دياگنوستيكالىق ەكىنشى بالالار ەمحاناسى اشىلدى.
اتالمىش مەكەمە سارىارقا اۋدانىندا تۇراتىن 80 مىڭنان استام بالاعا مەديتسينالىق قىزمەت كورسەتۋگە قاۋقارلى. 40 ورىندى كۇندىزگى ستاتسيونارى بار. وندا ەندوكرينولوگ, كارديورەۆماتولوگ, لوگوپەد, اللەرگولوگ, حيرۋرگ, نەفرولوگ, سۋردولوگ, گەماتولوگ, نەانوتولوگ, گاستروەنتەرولوگ, تراۆماتولوگ سەكىلدى ماماندار قابىلداۋ جۇرگىزە الادى.
ەمحانا زاماناۋي مەديتسينالىق قۇرىلعىلارمەن جابدىقتالعان. مۇندا فۋنكتسيونالدى دياگنوستيكالىق كابينەت, ۋلترا-دىبىستىق تەكسەرۋ, رەنتگەنولوگيالىق زەرتتەۋ, فيزيوتەراپيالىق ەمدەۋ كابينەتى جانە مەديتسينالىق الەۋمەتتىك كومەك كورسەتەتىن بولىمدەر بار.
ايتا كەتەرلىگى, №1 قالالىق بالالار اۋرۋحاناسى استانا قالاسى مەديتسينا ۋنيۆەرسيتەتىنىڭ پەدياتريا بويىنشا نەگىزگى كلينيكالىق بازاسى بولىپ تابىلادى. ونىڭ بەس كافەدراسىنىڭ پروفەسسورلىق-وقىتۋشىلىق قۇرامى بالالارعا مەديتسينالىق كومەك كورسەتىپ قانا قويماي, ساپالى قىزمەت كورسەتۋدى جوعارىلاتۋدا دارىگەر-مامانداردى ۇزدىكسىز وقىتىپ كەلەدى.
–استانا قالاسىنىڭ مەرەيتويى قارساڭىندا اشىلعان مەكەمە – ەلوردالىقتار ءۇشىن اسا ماڭىزدى الەۋمەتتىك نىسان. وسى ۋاقىتقا دەيىن استاناداعى №2 قالالىق بالالار اۋرۋحاناسى جانىندا بالالارعا ارنالعان جالعىز 20 ورىندىق كۇندىزگى ستاتسيونارلى مامانداندىرىلعان كلينيكالىق-دياگنوستيكالىق ەمحانا ءۇش ەسە جۇكتەمەمەن جۇمىس جاساپ كەلدى. جاڭا ەمحانانىڭ اشىلۋى قالانىڭ كىشكەنتاي تۇرعىندارىنا دەر كەزىندە مامانداندىرىلعان كومەك كورسەتىپ, ساپانى جوعارىلاتۋعا مۇمكىندىك بەرەدى, – دەيدى ەمحانا جۇمىسىمەن تانىستىرعان استانا قالاسى دەنساۋلىق ساقتاۋ باسقارماسىنىڭ باسشىسى ايگۇل سەگىزباەۆا.
گۇلميرا ايماعانبەت