استاناداعى ەتنو-مادەني ورتالىق وكىلدەرىنىڭ قاتىسۋىمەن وتكەن جيىندا اتا زاڭنىڭ نەگىزگى ۇستىندارى مەن قاعيداتتارى كەڭىنەن ءسوز بولدى. باس قوسقان 26 ۇلت پەن ۇلىس وكىلدەرى تاۋەلسىز قازاقستاننىڭ قۇقىقتىق ىرگەسى قالانعاننان باستاپ جۇرگىزىلگەن رەفورمالاردى سارالادى.
ەلىمىزدىڭ العاشقى كونستيتۋتسياسى 1993 جىلدىڭ 28 قاڭتارىندا قابىلدانعان. 1995 جىلى پرەزيدەنت ن.نازارباەۆ جاڭا كونستيتۋتسيانىڭ جوباسىن ازىرلەۋ ءۇشىن ساراپتامالىق-كونسۋلتاتيۆتىك كەڭەس قۇرۋ جونىندە قاۋلى شىعاردى. قازاقستان حالىقتارى اسسامبلەياسىنىڭ ەكىنشى سەسسياسىندا جان-جاقتى تالقىلاۋلاردان كەيىن كونستيتۋتسيا جوباسىن قولداۋ جونىندە قارار قابىلداندى. اتالمىش قاراردا پرەزيدەنتكە كونستيتۋتسيا جوباسىن جالپىحالىقتىق تالقىلاۋعا شىعارۋ ۇيعارىمى جاسالدى.
1995 جىلدىڭ 30 ماۋسىمى مەن 30 شىلدەسى ارالىعىندا كونستيتۋتسيا جوباسى بۇقارالىق اقپارات قۇرالدارىندا جاريالانىپ, وعان ەلىمىزدىڭ بارلىق جۇرتشىلىعى ءوز ۇسىنىستارى مەن تولىقتىرۋلارىن جاسادى. كونستيتۋتسيا جوباسىن تالقىلاۋعا 3,3 ملن قازاقستان ازاماتى قاتىسقان. تالقىلاۋ بارىسىندا ازاماتتاردان, ۇجىمداردان, قوعامدىق جانە ساياسي ۇيىمداردان, ۇلتتىق-مادەني ورتالىقتاردان 32000 ۇسىنىس پەن تولىقتىرۋ نۇسقاسى كەلىپ تۇسكەن. اتالمىش ۇسىنىستار مەن تولىقتىرۋلارعا كونسۋلتاتيۆتىك كەڭەس عىلىمي ساراپتاما جاساپ, كونستيتۋتسيانىڭ تۇپكىلىكتى نۇسقاسىنا 1100-دەن اسا تۇزەتۋلەر مەن تولىقتىرۋلار ەنگىزدى.
جيىندا ءسوز العان ءتۇرلى ۇلت وكىلدەرى كونستيتۋتسيا تاريحىنا تەرەڭ توقتالىپ, اتا زاڭ بارلىق قۇجاتتىڭ باستاۋى ەكەندىگىن باياندادى.
گۇلميرا ايماعانبەت
