تاۋەلسىزدىك سارايىندا كونستيتۋتسيا كۇنىنە وراي كورمە ءوتتى. شاراعا كونستيتۋتسيالىق كەڭەستىڭ مۇشەلەرى, قوعام قايراتكەرلەرى, زاڭ شىعارۋ, قۇقىقتىق ءتارتىپ ماسەلەلەرى جونىندەگى كوميتەت وكىلدەرى, مەملەكەتتىك جانە جەرگىلىكتى باسقارۋ كافەدراسىنىڭ پروفەسسورلارى, تاريحشى عالىمدار قاتىستى.
اتا زاڭعا ون جەتى جىل تولۋىنا وراي ۇيىمداستىرىلعان كورمەدە كونستيتۋتسيانىڭ ءار كەزەڭدەگى قالىپتاسۋ تاريحىن ايقىندايتىن قۇجاتتار قويىلدى. كەلۋشىلەر نازارىنا ۇسىنىلعان دەرەكتەر تاۋكە حاننىڭ “جەتى جارعىسىنان” باستاپ تاۋەلسىز قازاقستاننىڭ بۇگىنگى كونستيتۋتسياسىنا دەيىنگى ارالىقتى قامتيدى. سونىمەن قاتار, 1926 جىلدان باستاپ 1937, 1978, 1993 جانە 1995 جىلداردا قابىلدانعان كونستيتۋتسيالار تاريحى دا ءتۇرلى فوتوسۋرەتتەر مەن مۇراعات ماتەريالدارى نەگىزىندە ۇسىنىلعان. قازاق قوعامىنىڭ قالىپتاسۋ جۇيەسىنە بەلگىلى ءبىر دەڭگەيدە وزگەرىس الىپ كەلگەن “الاش” پارتياسى تۋرالى قۇندى مالىمەتتەر دە نازاردان تىس قالماعان. «ءبىز كونستيتۋتسيانىڭ قالىپتاسۋ كەزەڭى مەن دامۋ ديناميكاسىن ۇنەمى نازاردا ۇستاپ وتىرۋىمىز قاجەت. ال كونستيتۋتسيا قوعاممەن بىرگە دامىپ وتىرۋى ءۇشىن وعان دەر كەزىندە وزگەرىستەر ەنگىزگەنىمىز ءجون. ياعني, اتا زاڭنان قازىرگى قوعامنىڭ لەبى ايقىن كورىنۋى ءتيىس. سەبەبى, كونستيتۋتسيا ەل ازاماتتارىنىڭ قۇقىعى مەن بوستاندىعىنىڭ كەپىلى» دەيدى زاڭ عىلىمدارىنىڭ دوكتورى, پروفەسسور مارات باشيموۆ. كورمە سوڭى قوعام قايراتكەرلەرى جانە تاريحشىلاردىڭ قاتىسۋىمەن دوڭگەلەك ۇستەل جيىنىنا ۇلاستى.
گۇلميرا ايماعانبەت
