«انام مەنى كىشكەنتاي كەزىمدە ادامداردىڭ كوزى تيمەسىن دەپ «سارى شىمشىعىم» دەپ اتاعان ەدى. سەبەبى ءبىر ورىندا وتىرمايتىن, ەلگەزەك, وتە پىسىق بولىپپىن…».
بۇل – بەلگىلى قالامگەر, قازاقستاننىڭ قۇرمەتتى ءجۋرناليسى عاليا بالتابايدىڭ «Sary qyz» اتتى اڭگىمەلەر جيناعىنىڭ ءۇزىندىسى.
كىشكەنتاي عاليانىڭ شىتىرمانعا تولى بالالىق شاعى باياندالاتىن تۋىندى بالعىن بۇلدىرشىندەر مەن كوپشىلىك وقىرمانعا ارنالادى. قىسقا دا نۇسقا جازىلعان ءار اڭگىمەنىڭ ايتارى انىق, ءتىلى جەڭىل. اۆتوردىڭ ءوزى دە باسىنان وتكەن ءاربىر وقيعادان ءتۇيىن شىعارىپ, اقىل-كەڭەسىن ءبىلدىرىپ, وقىرمانمەن كەرى بايلانىس رەتىندە سۇراقتار قويادى. وسىلايشا كىتاپتى قولىنا العان ءاربىر جاس جەتكىنشەك اۆتورمەن تىلدەسىپ وتىرعانداي بولادى.
ساپالى مۇقابا, ەرەكشە ديزاين مەن اڭگىمە جەلىسىنە ساي سالىنعان يلليۋستراتسيالار بالالاردى عانا ەمەس, ۇلكەندەردى دە وزىنە باۋراپ الاتىنى ءسوزسىز. قىزىقتى سۋرەتتەر ارقىلى وقيعالاردى كوز الدىنا ەلەستەتكەن وقىرمان اۆتور ءومىرىن بەينەتاسپاداي سىرعىتىپ, ءبىر دەممەن وقىپ شىعادى. سونداي-اق جاس وركەندەر تۋىندى ارقىلى بۇگىنگى كونە كوز قاريالاردىڭ تاريحىمەن تانىسادى. اڭگىمەلەردىڭ تۇپكى يدەياسى ەڭبەككە باۋلۋ, وتاندى ءسۇيۋ, ادامي قۇندىلىقتاردى ساقتاۋعا باعىتتالادى.
بالالار ادەبيەتى بالانىڭ ءتىلىن, پسيحولوگياسىن ۇعۋدى, ويدىڭ جۇمىرلىعى مەن ويناقىلىعى ارقىلى ءبۇلدىرشىننىڭ جۇرەگىنە جول تابۋدى قاجەت ەتەدى. بيىلعى بالالار جىلىندا قالامگەر عاليا بالتابايدىڭ ەڭبەگى بالالار ادەبيەتىن تولىقتىرىپ, قولداۋعا سەپتەسەتىنى انىق.
