وقۋشىلار سارايىندا الماتى اۋدانى اكىمىنىڭ بالالارعا ارنالعان جاڭا جىلدىق شىرشاسى ءوتتى.
مەرەكەگە اۋدانداعى ءۇش جۇزگە تارتا جەتىم بالالار مەن اتا-انا قامقورلىعىنسىز قالعان جانە مۇمكىندىگى شەكتەۋلى جەتكىنشەكتەر قاتىستى. دۋماندى جيىننىڭ باسىندا الماتى اۋدانىنىڭ اكىمى بەكبول ساعىن جينالعان قاۋىمدى جاڭا جىلمەن قۇتتىقتادى.
«قازاقتىڭ «ەسكى جىل, ەسىركە, جاڭا جىل, جارىلقا» دەگەن ءسوزى بار. بۇل مەرەكەنى بالالار قاۋىمى ەرەكشە ىقىلاسپەن كۇتەدى. ءبىز – تاۋەلسىز مەملەكەتپىز. ءار بالانىڭ العا قويعان ماقساتى ورىندالىپ, بيىك شىڭدارعا جەتۋىنە سەبەپشى بولۋىمىز كەرەك. جاڭا جىلدا جاڭا تابىستارعا جەتىپ, يگى ىستەردىڭ جانىنان تابىلۋلارىنا تىلەكتەسپىن. ءار بالا وقۋدا وزات بولىپ, ءوزىن ەلدىڭ ءبىر مۇشەسى ەكەنىن تولىق سەزىنسە, ءبىزدىڭ دە اتقارىپ جاتقان جۇمىستارىمىزدىڭ زايا كەتپەگەنى دەپ بىلەمىن» دەيدى ول.
ارنايى دايىندالعان مەرەكەلىك قويىلىم مەن قارشا قىزىن ەرىتكەن اياز اتا كىشى كورەرمەندەردىڭ كوڭىلىن كوتەرىپ, كوزايىمىنا اينالدى. كەش سوڭىندا اۋدان اكىمىنىڭ اتىنان ارناۋلى سىيلىقتار تابىس ەتىلدى.
باعلان ورازالى
