مەرەيتويلىق شارالار بەكىتىلدى
جاقىندا قازاقستان رەسپۋبليكاسىنىڭ مەملەكەتتىك حاتشىسى گ.ابدىقالىقوۆانىڭ توراعالاعىمەن قازاقستان حالقى اسسامبلەياسى جىلىن ۇيىمداستىرۋ جانە وتكىزۋ جونىندەگى مەملەكەتتىك كوميسسياسىنىڭ كەڭەيتىلگەن وتىرىسى ءوتتى.
كەڭەس جۇمىسىنا مەملەكەتتىك كوميسسيانىڭ مۇشەلەرى, پارلامەنت دەپۋتاتتارى, مەملەكەتتىك ورگانداردىڭ وكىلدەرى, رەسپۋبليكالىق ەتنومادەني بىرلەستىكتەردىڭ باسشىلارى, قحا عىلىمي-ساراپتامالىق كەڭەسىنىڭ مۇشەلەرى, بۇقارالىق اقپارات قۇرالدارىنىڭ وكىلدەرى قاتىستى.
«ءبىز بۇگىن ەلباسىنىڭ 2014 جىلعى 29 تامىز كۇنگى جارلىعىمەن جاريالانعان 2015 – قازاقستان حالقى اسسامبلەياسى جىلىن ۇيىمداستىرۋ جانە وتكىزۋ جۇمىسىن ۇيلەستىرۋشى كەڭەسشى ورگان – مەملەكەتتىك كوميسسيانىڭ العاشقى وتىرىسىندا باس قوسىپ وتىرمىز. وسى كوميسسيانىڭ كەڭەسىپ قابىلداعان شەشىمدەرى, ءتيىمدى ۇسىنىمدارى ەلىمىز ءۇشىن, قازاقستاننىڭ الەمدىك وركەنيەتتەگى بەدەلىن ارتتىرۋ ءۇشىن ماڭىزدى دا جاۋاپتى جىلعا ارنالعان شارالاردىڭ ماعىنالى, ساپالى وتۋىنە ءوز ۇلەسىن قوسادى دەپ سەنەمىن» دەدى مەملەكەتتىك حاتشى گۇلشارا ابدىقالىقوۆا جينالعان قاۋىم الدىندا.
جيىن بارىسىندا 2015 جىلعا مەجەلەنگەن قازاقستان حالقى اسسامبلەياسى جىلىن ۇيىمداستىرۋ جانە وتكىزۋ جونىندەگى ۇلتتىق ءىس-شارالار جوسپارىن ىسكە اسىرۋ, قازاقستان رەسپۋبليكاسى كونستيتۋتسياسىنىڭ 20 جىلدىعىنا ارنالعان ءىس-شارالاردى ۇيىمداستىرۋ بويىنشا دايىندىق ماسەلەلەرى قارالدى.
مەملەكەتتىك كوميسسيانىڭ مۇشەلەرى قازاقستان حالقى اسسامبلەياسى جىلىن وتكىزۋ تۇجىرىمداماسىن, قازاقستان حالقى اسسامبلەياسى جىلىنىڭ ەمبلەماسىنىڭ (لوگوتيپ) جانە مەرەيتويلىق مەدال ەسكيزدەرىنىڭ ۇلگىلەرىن بەكىتتى.
سونىمەن قاتار, قر كونستيتۋتسياسىنىڭ 20 جىلدىعىن, قازاق حاندىعىنىڭ 550 جىلدىعىن, جەڭىستىڭ 70 جىلدىعىن قوسا العاندا, 2015 جىلعا ارنالعان مەرەيتويلىق ءىس-شارالاردىڭ جوسپارلارىن ىسكە اسىرۋ بويىنشا مەملەكەتتىك ورگانداردىڭ جۇمىسىن ۇيلەستىرۋ جانە ءوزارا ءىس-قيمىلدارىن ۇيىمداستىرۋ ماسەلەلەرى تالقىلاندى.
ايگۇل ۋايسوۆا