ۇيدەگى ءۇش جاسار ءسىڭلىمنىڭ ءتىلى «ر»-عا كەلمەيدى. ءتىلىن جاتتىقتىرۋ ءۇشىن راكەتا, روبوت, تراكتور دەگەن سوزدەردى قايتا-قايتا ايتقىزامىز. ناتيجە شامالى. «لاكەتا», «لوبوت», «تلاكتول» كۇيى قالادى ونىمىز. باستاپقىدا ەركەلىك شىعار دەيتىنبىز. بارا-بارا ساقاۋلىعى ۇدەي تۇسكەن سوڭ, دارىگەرگە اپاردىق. سويتسەك, مۇنداي مۇكىستىك ءبىراز بالادا بار ەكەن.
رەسپۋبليكالىق پەدياتريا جانە بالا حيرۋرگياسى عىلىمي ورتالىعىنىڭ نەۆروپاتولوگ-دارىگەرى, مەديتسينا عىلىمىنىڭ كانديداتى ءنۇربيبى جاقاۋوۆانىڭ ايتۋىنشا, كەيبىر وتباسىلاردا بالا 1-گە تولار-تولماستان كەلەسى ءسابي دۇنيەگە كەلىپ جاتادى. اكە-شەشەسىنىڭ بۇكىل ىقىلاسى سول باۋىرىنا اۋعانىن بىلگەن ءبۇلدىرشىن كىشىگىرىم كۇيزەلىسكە تاپ بولادى ەكەن. ناتيجەسىندە توماعا-تۇيىق قالىپقا ءتۇسىپ, پسيحيكالىق داعدارىستى باستان كەشەدى. سونىڭ كەسىرىنەن ءتىل مۇكىستىگى پايدا بولادى.
مۇنىمەن قوسا, بالانىڭ بىلدىرىن قىزىق كورىپ, ساقاۋلانا سويلەۋىنە ەرىك بەرۋ دە ونىڭ ءتىلىنىڭ دامۋىنا كەرى اسەر ەتۋى مۇمكىن.
– ءسابيىن «ساكوش», «ماكوش» دەپ ەركەلەتەتىن ەرەسەكتەر كوپ. دۇرىستاپ ەسكەرتۋدىڭ ورنىنا «بويمايدى», «كەيمەيدى», «ءۇفاي», «كاكاي» دەپ سويلەپ وتىرعان اكە-شەشەنىڭ بالاسىنا نە دەپ كىنا ارتاسىڭ بۇدان سوڭ؟ اتا-انا – بالا ءۇشىن قاشاندا يدەال. سوندىقتان, ەڭ اۋەلى, ءوزىمىز بالامەن ۇلكەن ادامدارشا تەڭ دارەجەدە سويلەسۋىمىز كەرەك. ەرىنبەي, جالىقپاي, ءار زاتتىڭ دۇرىس اتاۋىن جاتتاتقىزۋىمىز قاجەت, – دەيدى اتالمىش مەكەمەنىڭ پسيحولوگى گۇلجاميلا ءنۇسىپجانوۆا.
بوتاگوز ماراتقىزى
