باس جۇلدە – اكىم كۋبوگى
ەلوردادا بالالار جىلى اياسىندا فۋتبولدان جاسوسپىرىمدەر اراسىندا نۇر-سۇلتان قالاسى اكىمىنىڭ كۋبوگىن ساراپقا سالعان ءبىرىنشى تۋرنير ءوتتى.
نۇر-سۇلتان قالاسى دەنە شىنىقتىرۋ جانە سپورت باسقارماسىنىڭ باستاماسىمەن ۇيىمداستىرىلعان تۋرنيرگە قوستاناي, كوكشەتاۋ, پاۆلودار قالالارىنان, سونداي-اق ەلوردادان 2007-2008 جىلى تۋعان بالالاردان قۇرالعان كوماندالار قاتىستى. «تارلان ارەنا» ستاديونىندا وتكەن ءار ويىن تارتىستى ءارى قىزىقتى ءوتتى. جارىس رەگلامەنتىنە سايكەس, ەكى توپقا بولىنگەن التى كوماندانىڭ اراسىنان ءبىرىنشى جانە ەكىنشى ورىن العاندارى باس جۇلدەنى ساراپقا سالدى.
ءۇش كۇنگە سوزىلعان جارىس قورىتىندىسىندا نۇر-سۇلتان قالاسىنىڭ №8 بالالار مەن جاسوسپىرىمدەردىڭ مامانداندىرىلعان وليمپيادالىق رەزەرۆتى سپورت مەكتەبىنىڭ قوس كومانداسى فينالعا شىقتى. وسىلايشا 1-بجمورسم (اعا جاتتىقتىرۋشىسى ا.قوجابەكوۆ) جانە 2-بجمورسم كوماندالارى اراسىنداعى باسەكەدە ءبىرىنشى كوماندانىڭ باعى جانىپ, نۇر-سۇلتان قالاسى اكىمىنىڭ كۋبوگىن جەڭىپ الدى. ءۇشىنشى ورىندى «ۆيستا» جەكە فۋتبول كلۋبىنىڭ جاسوسپىرىمدەرى يەلەندى.
تۋرنير جەڭىمپازدارى مەن ءجۇلدەگەرلەرىنە كۋبوك, مەدالدار جانە ديپلومدار تابىستالدى. سونداي-اق «ۇزدىك قاقپاشى», «ۇزدىك قورعاۋشى» جانە «ۇزدىك شابۋىلشى» اتالىمدارى بويىنشا ۇزدىك تانىلعاندارعا سىيلىق بەرىلدى.
جارىستى ۇيىمداستىرۋشىلاردىڭ ءبىرى, نۇر-سۇلتان قالاسى №8 بجمورسم ديرەكتورى دىنمۇحامەد قۇراماەۆ باستى ماقسات سالاۋاتتى ءومىر سالتىن ناسيحاتتاۋعا, ونىڭ ىشىندە بالالار سپورتىن دامىتۋعا باعىتتالعان ايتۋلى جارىس الداعى ۋاقىتتا داستۇرگە اينالاتىنىن, ەلىمىزدىڭ بارلىق ايماعىنان كوماندالار شاقىرىلاتىنىن جەتكىزدى.
بايان اسىلبەكوۆا