قالالىق ءماسليحاتتىڭ كەزەكتەن تىس قىرىق التىنشى سەسسياسىنا استانا اكىمىنىڭ ورىنباسارلارى, الماتى, سارىارقا, ەسىل اۋداندارىنىڭ اكىمدەرى مەن بۇقارالىق اقپارات قۇرالدارىنىڭ وكىلدەرى قاتىستى.
كۇن تارتىبىندەگى العاشقى ماسەلە بويىنشا ءسوز العان قالا اكىمى اپپاراتىنىڭ مەملەكەتتىك-قۇقىق ءبولىمىنىڭ باسشىسى داۋلەت دوسقۇلوۆ قالالىق ءماسليحاتتىڭ «قازاقستان رەسپۋبليكاسىنىڭ ەلورداسى – استانا قالاسىن باسقارۋ ءتاسىمى تۋرالى» 2013 جىلعى 27 ماۋسىمداعى شەشىمىنە وزگەرىستەر ەنگىزىلگەنىن حابارلادى. وسىعان وراي بايانداماشى جينالعاندارعا جاڭادان ءۇش باسقارمانىڭ قۇرىلاتىنىن جەتكىزدى.
– ءبىز الداعى ۋاقىتتا مەملەكەتتىك مەكەمەلەر قاتارىن جاڭا ءبولىمشەلەرمەن تولىقتىرماقشىمىز. وسىلايشا, استانادا مەملەكەتتىك ساۋلەت-قۇرىلىس باقىلاۋ باسقارماسىن, جەردى پايدالانۋ مەن ساقتاۋدى باقىلاۋ جونىندەگى باسقارمانى, سونداي-اق مەملەكەتتىك ساتىپ الۋ باسقارماسىن قۇرۋ جوسپارلانىپ وتىر, – دەدى د.دوسقۇلوۆ. – وسى كەستە بەكىتىلگەننەن كەيىن استانا اكىمدىگىنىڭ شەشىمىمەن بۇل قۇرىلىمدار ادىلەت ورگاندارىندا تىركەلەدى.
بۇل ماسەلەنى ءماسليحات دەپۋتاتتارى ءبىراۋىزدان ماقۇلدادى.
ودان سوڭ جەرگىلىكتى بيۋدجەتتىك ينۆەستيتسيالىق جوبالار اراسىندا قاراجاتتى قايتا ءبولۋ ماسەلەسى قاراستىرىلىپ, قالا اكىمدىگىنىڭ جانىنداعى استانا قالاسىنىڭ ازىق-تۇلىك وڭىرلىك تۇراقتاندىرۋ قورلارىن قالىپتاستىرۋ جانە پايدالانۋ ءجونىندەگى كوميسسيانىڭ, سونداي-اق استانا قالاسىنىڭ اگروونەركاسىپتىك كەشەنى سۋبەكتىسى ينۆەستيتسيالىق سالىنىمدار كەزىندە جۇمساعان شىعىستارىنىڭ ءبىر بولىگىنىڭ ورنىن تولتىرۋ بويىنشا سۋبسيديالاۋ ماسەلەلەرى جونىندەگى كوميسسيانىڭ قۇرامى وزگەرتىلدى.
گۇلبارشىن وكەشقىزى
