ءبىزدىڭ ماقسات – ارىپتەستەرىمىزدى ۇيرەتۋ
كەشە استاناعا ارنايى كەلگەن رەسەيلىك مامان ەلىمىزدىڭ ءار ايماعىنان كەلگەن اكۋشەر-گينەكولوگ ماماندارعا شەبەرلىك ءدارىسىن وتكىزدى. ءۇزىلىستى پايدالانا وتىرىپ, عالىمدى از-كەم اڭگىمەگە تارتقان ەدىك.
ۆيكتور ستۋروۆ, ءنوۆوسىبىر مەملەكەتتىك مەديتسينا ۋنيۆەرسيتەتىنىڭ گەماتولوگ دارىگەرى, مەديتسينا عىلىمدارىنىڭ دوكتورى, پروفەسسور:
– ۆيكتور گەننادەۆيچ, باسقوسۋدا قانداي تاقىرىپتار تالقىلاندى؟
– اكۋشەرلىك جانە گينەكولوگيا سالاسىن جەتىلدىرۋ جونىندەگى حالىقارالىق سەمينار اياسىندا وتكەن شەبەرلىك دارىسىندە كوپتەگەن تاقىرىپتار قاراستىرىلدى.
بۇگىنگى تاڭدا ايەلدەر اراسىندا كەزدەسەتىن اۋرۋ تۇرلەرى بەلەڭ الۋدا. جۇكتىلىك كەزىندەگى گەستوز
اۋرۋى – قازىرگى اكۋشەرلىك سالاداعى وزەكتى پروبلەمانىڭ ءبىرى. ايەلدەردىڭ جۇكتىلىك كەزىندەگى اسقىنعان اۋرۋ ءتۇرى, ول انا ىشىندەگى ءنارەستەنىڭ ەڭ ماڭىزدى ورگاندارى مەن جۇيكە جۇيەسى قىزمەتىنىڭ بۇزىلۋىنا اكەلەدى. وزدەرىڭىز بىلەسىزدەر, بۇرىن ايەلدەر اراسىندا جاتىردان قان كەتۋ باستى ءماسەلە بولسا, بۇگىندە, كەرىسىنشە, ۇيىپ قالۋ جيىلەپ كەتتى. بۇرىن تاجىريبەدە مۇنداي اۋرۋ تۇرلەرى ءجيى كەزدەسپەگەندىكتەن, ماماندار كەيدە باسقا اۋرۋمەن شاتاستىرىپ جاتادى.
سوندىقتان مۇنداي اۋرۋلاردى انىقتاۋدىڭ دياگنوستيكاسىن جەتىلدىرۋ كەرەك دەپ ويلايمىن. انانى بالا بوسانعاننان كەيىن ەمەس, بالا تۋعانعا دەيىنگى دەنساۋلىعىن زەردەلەۋ قاجەتتىلىگىن قولعا العان ءجون.
– مۇنداي اۋرۋلاردىڭ كوبەيۋىنە نە سەبەپ دەپ ويلايسىز؟
– بىرىنشىدەن, قازىرگى جاستار اراسىندا گورمونالدى پرەپاراتتاردى ەرتە باستان قولدانۋ كوپ كەزدەسەدى. بۇل ءوز كەزەگىندە جۇكتىلىك كەزىندە ءتۇرلى اۋرۋلاردى تۋدىرادى. ناتيجەسىندە ىشتەگى بالاعا دا كەرى اسەرىن تيگىزەدى. ەكىنشىدەن, ەكولوگيالىق جاعداي دەپ ايتار ەدىم. اسىرەسە, قازاقستاندا سەمەي سياقتى ەكولوگيالىق قولايسىزدىق قالىپتاسقان ورتادا انا مەن بالادا كەزدەسەتىن ءتۇرلى قان اۋرۋلارى زاردابىن تيگىزىپ كەلەدى. مەديتسينا قىزمەتكەرلەرىنە ارنالعان شەبەرلىك دارىسىندە اكۋشەرلىك سالاداعى دياگنوستيكا, پروفيلاكتيكالىق جۇمىستار, ەمدەۋ ءىسى جونىندەگى ماسەلەلەر كەڭىنەن تالقىلاندى.
– قازاقستاندا دياگنوستيكالىق زەرتتەۋ قالاي دامىعان؟
– راس, قازاقستاندا مەديتسينا قارقىندى دامىپ كەلەدى. سەبەبى, مۇندا زاماناۋي جابدىقتار, جوعارى ساپادا قىزمەت كورسەتەتىن كلينيكالار بار. مەديتسينالىق كلاستەر قالىپتاسقان دەپ ايتۋعا بولادى. تەك استانانىڭ وزىندە قانشاما ورتالىقتار جۇمىس ىستەيدى. ءبىزدىڭ ماقساتىمىز – ارىپتەستەرگە ءوز بىلگەنىمىزدى ۇيرەتۋ, تاجىريبەمىزبەن ءبولىسۋ. مۇندا دا جوعارى ساناتتى گەماتولوگ, گەموستازيولوگ دارىگەرلەر بار. بىلىكتى ماماندار كوپ بولسا, دياگنوستيكا سالاسى دا العا قادام باساتىنى ءسوزسىز. ءبىزدىڭ العاشقى قادامىمىز دا سول, جاس اكۋشەر ماماندارعا وسى سالادا كەزدەسەتىن اۋرۋ تۇرلەرىن انىقتاۋدىڭ, ەمدەۋدىڭ جولدارىن كورسەتۋ, پىكىر الماسۋ. بۇل رەتتە ورتالىقتا ۇيىمداستىرىلىپ وتىرعان حالىقارالىق سەمينارلاردىڭ بەرەرى مول دەپ ويلايمىن. استانادا وسىنداي شەبەرلىك دارىستەرى ءجيى ۇيىمداستىرىلىپ تۇرسا, ەكى ەل اراسىنداعى مەديتسينالىق احۋال ودان ءارى جاقساراتىنى ءسوزسىز.
– اڭگىمەڭىزگە راحمەت!
گۇلميرا ايماعانبەت