استاناداعى «رەديسسون» قوناق ۇيىندە «بولاشاق» باعدارلاماسىنىڭ تۇلەكتەرىنە ارنالعان بوس جۇمىس ورىندار جارمەڭكەسى اشىلدى. جارمەڭكەدە «حالىقارالىق باعدارلامالار ورتالىعى» اق پرەزيدەنتى ساياسات نۇربەك جۋرناليستەردىڭ سۇراقتارىنا جاۋاپ بەردى.
– بۇگىندە قانشا تۇلەك جۇمىسقا ورنالاستىرىلدى؟
– بۇل جارمەڭكەگە 600-گە جۋىق تۇلەك قاتىسۋى مۇمكىن. ولاردىڭ دەنى باكالاۆر باعدارلاماسىن تامامداعان. ال, ماگيستراتۋرانى بىتىرگەن مامانداردىڭ بارلىعى بۇگىندە جۇمىسپەن تولىق قامتىلىپ وتىر. سەبەبى, ولارعا سۇرانىس جوعارى. ايتا كەتەيىك, بوس جۇمىس ورىندارى جارمەڭكەسىنە مۇناي-گاز جانە ەنەرگەتيكا سالاسىنىڭ جەتەكشى كومپانيالارى قاتىسۋدا. ءبىز ىرگەلى زەرتتەۋ جۇمىستارىن وتكىزىپ, «بولاشاق» باعدارلاماسى 20 جىل ىشىندە ەلىمىزگە قانشالىقتى پايدا اكەلگەنىن انىقتاپ كورمەكپىز. قولعا الىنعان مەرزىم ىشىندە ونىڭ تيىمدىلىگى ءالى بىردە-ءبىر رەت زەرتتەلگەن ەمەس. سول سەبەپتى «بولاشاق» باعدارلاماسى تۇلەكتەرىنىڭ ءوز ەلىنە نەندەي ماتەريالدىق جانە ماتەريالدىق ەمەس پايدا اكەلگەنى, شىنىمەن دە, ۇلكەن جۇمىس بولماق. ونىڭ ناتيجەسىن قىركۇيەك ايىندا جاريالايمىز.
– وسى كۇنگە دەيىن قانشا ادام «بولاشاق» ستيپەنديا-سىنا يە بولدى؟
– جيىرما جىلدىڭ ىشىندە 9532 ادام «بولاشاق» ستيپەندياسىن الدى. ەلىمىزدىڭ جەتەكشى سالالارىندا 5760 تۇلەك ەڭبەك ەتۋدە. باعدارلاما بويىنشا تەك باي-باعلانداردىڭ عانا بالالارى ءبىلىم الادى دەگەن – بوس ءسوز. بولاشاقتىقتاردىڭ 80-90 پايىزى – وڭىرلەردەن, قاراپايىم وتباسىلاردان شىققاندار. «بولاشاق» تۇلەكتەرىنىڭ ءبارى مەملەكەتتىك قىزمەتتە دەگەن پىكىر دە جاڭساق. بۇگىنگە دەيىن شەتەلدەن ءبىلىم العان 6 مىڭعا تارتا تۇلەكتىڭ 11 پايىزى عانا مەملەكەتتىك قىزمەتتە. ەلۋ پايىزدان استامى جەكەمەنشىك كومپانيالاردا جۇمىس ىستەيدى.
– قانشا تۇلەك جۇمىسسىز ءجۇر؟
– قازىرگى كەزدە قازاقستاندا جۇمىسقا ورنالاسپاعان 85 تۇلەك بار. الايدا, ولار ديپلومدارىن ءالى الماعان. «بولاشاق» باعدارلاماسى بويىنشا شەتەلدە ءبىلىم الىپ ءجۇرىپ, وقۋدى تاستاپ كەتكەن جاستار دا بار. وسى ماسەلەگە قاتىستى 27 ءىس سوتقا جىبەرىلدى. ونىڭ 20-سى ءبىزدىڭ پايدامىزعا شەشىلسە, جەتەۋى ءالى قارالىپ جاتىر. زاڭ بويىنشا ونداي ازاماتتار رەسپۋبليكالىق بيۋدجەتتەن وقۋى مەن شاكىرتاقىسىنا كەتكەن شىعىندى وتەۋى ءتيىس. سوتتىڭ شەشىمىمەن وعان 10-15 جىل بەرىلەدى. ال, كەپىلدىكتە تۇرعان ءۇي-جايلار شىعىندى وتەۋدىڭ ەڭ سوڭعى شاراسى رەتىندە قاراستىرىلادى. تۇلەكتەردىڭ باسىم بولىگى استانا جانە الماتى قالالارىندا جۇمىس ىستەپ جاتىر. ءبىز بۇل ءۇردىستى وزگەرتىپ, ولاردى ايماقتارعا جىبەرىپ وتىرۋدى كوزدەيمىز. بۇگىنگى تۇلەكتەردىڭ 60 پايىزى – تەحنيكالىق ماماندار. دەمەك, ولاردىڭ ەڭبەك نارىعى استانا مەن الماتى ەمەس. ونداي تۇلەكتەر وڭىرلەردە جۇمىس ىستەپ, ەلىمىزدىڭ وندىرىستىك الەۋەتىن كوتەرۋى ءتيىس. ءبىزدىڭ ەندىگى ماقساتىمىز دا – سول. تەحنيكالىق ءبىلىمى بار «بولاشاق» تۇلەكتەرىن جيناپ, ءوندىرىس وشاقتارىنا جىبەرەتىن بولامىز.
