سەرىكجاننىڭ سۋرەتتەرىندە كوبىنەسە تابيعاتتىڭ كەلبەتى كورىنىس تاپقان. جازدىڭ جايماشۋاق كۇنى, قۇبا بەل, كوگىلدىر اسپان… وسىنىڭ ءبارى كوز الدىڭىزدا باسقا بوياۋمەن ناقىشتالا تۇسەدى. ياعني, قىلقالام شەبەرىنىڭ ءوزى تۇسىنگەن, ءوزى سەزىنگەن, ءوزىنىڭ جۇرەگىنە شۋاعىن توككەن ساتتەر سول قالپىندا كورەرمەننىڭ كوكىرەك سارايىنا قوناقتايتىنداي.
سۋرەتشى ءوزىنىڭ ۇستانىمىن رەاليستىك باعىت دەيتىنى سوندىقتان. ءوزى تۋعان ولكەسىنىڭ تاۋى مەن تاسىن, سۋى مەن وزەنىن, ورمانى مەن توعايىن كەنەپ بەتىنە بەدەرلەپ ءتۇسىرۋدى ماقسات ەتكەن. «وسى ارقىلى بولاشاق ۇرپاق ءوز تۋعان جەرىن قادىرلەپ, قازاقتىڭ بايتاق دالاسىنىڭ كيەسىن سەزىنىپ وسسە» دەيدى سەرىكجان. سۋرەتشىنىڭ تاعى ءبىر قالت جىبەرمەيتىن تاقىرىبى – حالقىمىزدىڭ سالت- ساناسىن, ادەت-عۇرپىن, تۇرمىس-تىرشىلىگىن بەدەرلەۋى. ونى ءوز بولمىسىم, باستى ەرەكشەلىگىم دەپ تانيدى.
سەرىكجان ىسقاقبەكۇلى – قحر شىڭجاڭ سۋرەتشىلەر وداعىنىڭ مۇشەسى. قحر شۇار ىلە قازاق اۆتونوميالى وبلىسى, كۇنەس اۋدانى كەڭسۋ اۋىلىندا تۋعان. 2000 جىلى شىڭجان كوركەمونەر اكادەمياسىنىڭ سۋرەت فاكۋلتەتىنىڭ مايلى بوياۋلى كاسىبىن بىتىرگەن. وسىندا پەداگوگيكالىق ۋنيۆەرسيتەتتى اياقتاپ, 2016 جىلى قازاق ۇلتتىق ونەر ۋنيۆەرسيەتىندە كەسكىندەمە ماماندىعى بويىنشا ونەرتانۋ عىلىمدارىنىڭ ماگيستراتۋراسىن بىتىرگەن. ول – قازىر وسى وقۋ ورنىنىڭ «ستسەنوگرافيا جانە ساندىك ونەر» كافەدراسىنىڭ وقىتۋشىسى. ونىڭ قازاقتىڭ كوشپەلى ءومىرى مەن ۇلتتىق مادەنيەتىن بەينەلەگەن «ناۋرىز», «كۇز», «قىستاۋلىق», «كۇز كەلبەتى» تاقىرىبىنداعى مايلى بوياۋ تۋىندىلارى شىڭجاڭدىق سۋرەتشىلەر فەستيۆالىندە جوعارى باعالانىپ, ماراپاتتالعان. ال «ۇرشىق ءيىرۋ» اتتى مايلى بوياۋ تۋىندىسى 2004 جىلى قحر مەملەكەتتىك سۋرەتشىلەر وداعى جاعىنان ۇيىمداستىرىلعان كاسىبي سۋرەتشىلەر كونكۋرسىندا ءىى ورىنعا, «نارات ساحاراسى» اتتى مايلى بوياۋ تۋىندىسى 2006 جىلى شىڭجاڭ, حاينان, يۇننان ءۇش ولكە بويىنشا وتكەن سۋرەتشىلەر فەستيۆالىندە ءىىى ورىنعا يە بولادى.
سەرىكجاننىڭ ءوز قولىمەن جاساعان 300-گە جۋىق دومبىرا, قوبىز, جەتىگەن, باربىت, شەرتەر سياقتى قازاقتىڭ مۋزىكالىق اسپاپتارى شىڭجاڭ كولەمىندەگى ونەر ادامدارىنىڭ يگىلىگىنە جاراپ تۇر.
