استاناعا كۇن سايىن قوناق اعىلىپ كەلىپ جاتادى. جۇرتتىڭ كوبى الدىن الا قوناقۇي ىزدەيدى. ونىڭ ەش قيىندىعى جوق. قالتا تەلەفونىڭنان «استانا قوناقۇيلەرى» دەپ جازىپ, تەتىكتى باسىپ قالساڭ, الۋان ءتۇرلى قوناقۇيلەردىڭ سۋرەتتەرى, كلاسى, مەكەنجايى, باعاسى, ت.ب. جىپىرلاپ شىعادى. ىزدەگەن ادامنىڭ باعاسىنا بىردەن نازار اۋداراتىنى انىق.
جۋىردا ءبىر كەلەڭسىزدىكتى كوزىممەن كوردىم. استاناداعى قوناقۇيلەردىڭ (90 پايىزعا جۋىعىنىڭ اتاۋلارى اعىلشىن تىلىندە) كوپشىلىگى قىزمەت باعاسىن تەڭگەمەن ەمەس, رۋبلمەن كورسەتەدى. ەگەر سەنبەسەڭىز, booking.com, hotels.com دەگەن سايتتارعا كىرىپ كورىڭىز. ويتكەنى قوناقۇي ىزدەسەڭىز, عالامتوردان بىردەن وسى سايتتار اشىلادى. بۇل قاي باسىنعانى؟ سوندا الگى قوناقۇيلەر قاي مەملەكەتتىڭ اۋماعىندا ورنالاسقان؟ ونىڭ قوجايىندارى قاي مەملەكەتتىڭ اۋاسىن جۇتىپ, سۋىن ءىشىپ وتىر؟ ول ول ما, شەتەلدىك سايتتار (جوعارعى جاعىنداعى ءتىل تاڭداۋ تەتىگىن باسساڭىز) قولداناتىن 43 ءتىلدىڭ ىشىندە قازاق ءتىلى جوق. جاي عانا مىسال. ءسىز رەسەيگە بارعاندا قانداي ءبىر سايتتان قوناقۇي ىزدەگەنىڭىزدە باعاسىن تەڭگەمەن جازعانىن كوردىڭىز بە؟ جوق.
مەملەكەتتىك ءتىلدى سىيلاماۋ – سول ەلدى, ۇلتتى سىيلاماۋ دەگەن ءسوز. استانانىڭ تورىندەگى قاپتاعان قوناقۇيلەردەن سول پيعىل مەنمۇندالاپ تۇر. قازاقشا ايتقاندا, «ءاي دەيتىن اجە, قوي دەيتىن قوجا جوق». مۇنى كىم قاداعالايدى؟ ماسەلەنىڭ مانىسىنە ۇڭىلمەك بولىپ, نومىرلەردىڭ قۇنىن رۋبلمەن كورسەتكەن «شاڭىراق» قوناقۇيىنە تەلەفون شالدىم. تۇتقانى كوتەرگەن اكىمشى اقبوكەن اتتى قىز بۇعان ەشقانداي تاڭدانىس بىلدىرمەدى. «Booking.com دەگەن – رەسەيلىك كومپانيا. ول عالامتورداعى جارنامادا قوناقۇيدىڭ باعاسىن قاي تىلدە جازاتىنىن ءوزى بىلەدى. مەنىڭشە, مۇندا تۇرعان ەشتەڭە جوق» دەدى ول تاڭدايىن تاقىلداتىپ.
«ءبىز ورىس تىلىنەن قورعانۋىمىز كەرەك!» دەپ مالىمدەپ ەدى كەزىندە ساياساتتانۋشى بەرىك ابدىعاليۇلى. تاۋەلسىز ەل بولىپ, ەلدىكتىڭ تۇعىرىن نىعايتقانىمىزعا 25 جىلدان اسسا دا, كورشى ەلدىڭ اقپاراتتىق, تىلدىك ەكسپانسياسى تولاستاماي تۇر. مەنىڭشە, اقپاراتتىق قاۋىپسىزدىك ماسەلەسىنە كەلگەندە مەملەكەتتىك ءتىلىمىزدى قورعاۋعا ءبىرىنشى كەزەكتە ماڭىز بەرۋىمىز كەرەك.
تولەن تىلەۋباي
