چەمپيوندىقتىڭ اۋىلى الىس ەمەس

 «استانا» فۋتبول كلۋبى ەل بىرىنشىلىگىنىڭ 29-تۋرىندا سىرت الاڭدا «اقتوبەمەن» كەزدەستى.

ەۋروكۋبوكتا اتوي سالىپ جاتقان «استانا» ىشكى چەمپيوناتتىڭ ويىندارىندا جارتى كۇشپەن جەڭىسكە جەتىپ جاتىر دەۋگە بولادى. ياعني, نەگىزگى قۇرامداعى بىرقاتار ويىنشىنى دەمالدىرۋدى ءجون كورۋدە. مىسالى, ەۋروپا ليگاسىنىڭ ماتچ­تارىندا ەكىنشى تايمنان باستاپ ويىنعا قوسىلىپ جۇرگەن رانگەلو يانگا قازاقستان پرەمەر-ليگاسىندا العاشقى مينۋتتان باستاپ كوپ كوزگە ءتۇسىپ ءجۇر. ول اقتوبەدە وتكەن ويىننىڭ 42-مينۋتىندا باسپەن گول سوعىپ ەسەپ اشتى.
ەكىنشى تايمدا الاڭ يەلەرى تارازى باسىن تەڭەستىردى. 55-مينۋتتا سايات جۇماعالي ەرەكشەلەندى. ال 62-مينۋتتا ەلوردالىق سەرىكجان مۋجيكوۆتىڭ گولى كومانداسىن قايتادان العا شىعاردى. جانە بۇل جەڭىستى گول بولدى.
وسىلايشا «استانا» 2:1 ەسەبىمەن ۇتىپ, تۋرنير كەستەسىندەگى ۇپايىن دوڭگەلەكتەپ 70-كە جەتكىزدى. ال ءىزىن قۋىپ كەلە جاتقان الماتىنىڭ «قايراتى» شىمكەنتتىڭ «ورداباسى» كومانداسىنان 2:0 ەسەبىمەن جەڭىلىپ, باستى قارسىلاسىنان 10 ۇپاي قالىپ قويدى.
جالپى ويىندارعا قىسقاشا توقتالساق, «توبىل» «ەرتىستەن» 1:2 جەڭىلدى. قالعان كەزدەسۋلەر تۇگەل تەڭ اياقتالدى: «اقجايىق» – «قىزىلجار» – 0:0, «جەتىسۋ» – «شاحتەر» – 1:1 جانە «قايسار» – «اتىراۋ» – 2:2.