قالا اكىمى باقىت سۇلتانوۆتىڭ توراعالىعىمەن قوعامدىق دەنساۋلىق ساقتاۋ باسقارماسىنىڭ القا وتىرىسى ءوتتى.
وتكەن جىلمەن «دەنساۋلىق» مەملەكەتتىك باعدارلاماسىن جۇزەگە اسىرۋدىڭ ءۇشىنشى جىلى قورىتىندىلانىپ وتىر. «ءبىز استانالىقتاردىڭ ءومىر ءسۇرۋ ۇزاقتىعىن 76,2 جاسقا دەيىن ارتتىردىق. بۇل ەل بويىنشا ورتاشا كورسەتكىشتەن 3,2 جىلعا جوعارى. بۇل كورسەتكىشكە ءبىز بالا تۋ كورسەتكىشىنىڭ ارتۋى مەن جالپى ءولىم-ءجىتىمنىڭ تومەندەۋى ارقاسىندا قول جەتكىزدىك» دەدى جيىندى اشقان ب.سۇلتانوۆ. اكىم ءوز سوزىندە ەلوردانىڭ دەنساۋلىق ساقتاۋ قىزمەتىنىڭ مەملەكەت باسشىسى قويعان مىندەتتەرگە سايكەس, ءولىم مەن مۇگەدەكتىكتىڭ, سونداي-اق انا مەن بالا ءولىمىنىڭ, قان اينالىمى جۇيەسى اۋرۋلارىنىڭ, ونكولوگيالىق اۋرۋلاردىڭ, تۋبەركۋلەز مەن جاراقاتتانۋدىڭ نەگىزگى سەبەپتەرىنىڭ الدىن الۋعا باعىتتالعاندىعىن ايتتى.
ەسەپتى جىلعا بايانداما جاساعان قالالىق قوعامدىق دەنساۋلىق ساقتاۋ باسقارماسىنىڭ باسشىسى قامالجان نادىروۆ مىنا دايەكتەرگە توقتالىپ ءوتتى. ياعني, وتكەن جىلى قالالىق اۋرۋحانالاردا 200 مىڭنان اسا ادام ەمدەلگەن, 57 مىڭعا جۋىق وتا جاسالىپ, 28 مىڭنان استام بالا دۇنيە ەسىگىن اشقان. قالا ەمحانالارىنا تۇرعىندار 4,5 ملن رەت قارالعان. ءجۇز مىڭنان استام ناۋقاس تەگىن ءدارى-دارمەكپەن قامتاماسىز ەتىلگەن.
ۇستىمىزدەگى جىلى جاڭادان 4 دياگنوستيكا ورتالىعى, 11 دارىگەرلىك امبۋلاتورياسى اشىلادى. سونىمەن بىرگە «استانالىق دارىگەر» جوباسى ىسكە قوسىلاتىن بولادى. بۇل ەلوردا مەديتسينا قىزمەتكەرلەرىنىڭ مارتەبەسىن كوتەرىپ, قىزمەتىن ىنتالاندىرۋعا اسەرىن تيگىزبەك. مەديتسينالىق مەكەمەلەردىڭ ماتەريالدىق-تەحنيكالىق بازاسى جاڭعىرتىلادى. جەدەل جاردەم قىزمەتىن جەتىلدىرۋ ءۇشىن 85 جەدەل جاردەم كولىگى ساتىپ الىنادى, ونىڭ 25-ءى – رەانيموبيلدەر. قامالجان نادىروۆ سونداي-اق باسقارمانىڭ اعىمداعى جىلعا ارنالعان جوسپارلارىنا توقتالىپ, كورسەتىلەتىن مەديتسينالىق قىزمەتتەردىڭ ساپاسى مەن قولجەتىمدىلىگىن ارتتىرۋعا باسا نازار اۋدارا وتىرىپ, حالىقتىڭ دەنساۋلىعىن ودان ءارى جاقسارتۋ بويىنشا جۇمىستار جالعاستىرىلاتىنىن ايتتى.
