استانا قالاسىنداعى تراۆماتولوگيا جانە ورتوپەديا عىلىمي-زەرتتەۋ ينستيتۋتىندا دارىگەرلەر ۇجىمى وزدەرى باستاما كوتەرىپ «دەنساۋلىق كۇنى» سپورتتىق-ساۋىقتىرۋ مەرەكەسىن وتكىزدى. جارىستار ەمدەۋ مەكەمەسىنىڭ اشىق الاڭىندا ءوتتى.
مەكەمەنىڭ كاسىپوداق ۇيىمداستىرعان شاراعا دارىگەرلەر, مەدبيكەلەر. ينجەنەرلىك-قىزمەت كورسەتۋ بولىمشەلەرىنىڭ ماماندارى تۇگەلدەي قاتىستى. ءار بولىمشە وزدەرىنىڭ ۇراندارىن, كورنەكتى قۇرالدارىن الىپ شىقتى. ال جارىستار باعدارلاماسىندا جەڭىل اتلەتيكا ەستافەتاسى, شاحمات, تەننيس, كىر تاسىن كوتەرۋ, ارقان تارتۋ سپورت تۇرلەرى ەنگىزىلدى.
وتە تارتىستى ءارى قىزىقتى وتكەن جارىستاردىڭ جەڭىمپازدارىنا ينستيتۋت ديرەكتورىنىڭ كلينيكالىق جۇمىستار بويىنشا ورىنباسارى ش.بايماعامبەتوۆ پەن كاسىپوداق كوميتەتىنىڭ جەتەكشىسى ك.ورالوۆا ديپلومدار مەن سىيلىقتار تابىس ەتتى. ەڭ باستىسى, دارىگەرلەر قاۋىمى اۋرۋحانادا ەمدەلىپ جاتقان ناۋقاستاردىڭ الدىندا سالاماتتى ءومىر سالتىنىڭ ونەگەسىن كورسەتە ءبىلدى.
