دوستىقتىڭ جول كارتاسى جاسالادى
استانا اكىمىنىڭ ورىنباسارى باحتيار ماكەن رەسەي فەدەراتسياسى قۇرامىنداعى ۋدمۋرت رەسپۋبليكاسىنىڭ باسشىسى الەكساندر برەچالوۆپەن كەزدەستى. ولار كاسىپكەرلىك, ەكونوميكا, مادەنيەت جانە سپورت سالاسىنداعى بىرقاتار جوبالار بويىنشا ءوزارا ءتيىمدى ىنتىماقتاستىق ماسەلەلەرىن تالقىلادى.
ۋدمۋرتيادان كەلگەن رەسمي قوناقتاردى قارسى العان باحتيار ماكەن ءوز سوزىندە رەسەي مەن قازاقستان اراسىندا بارلىق دەڭگەيدە سەنىمدى قارىم-قاتىناس ورنىعىپ, وڭىرارالىق ىنتىماقتاستىقتىڭ بەلسەندى دامىپ كەلە جاتقانىن اتاپ ءوتتى. «ءبىزدى رەسەيمەن سان عاسىرلىق باۋىرلاس قاتىناستار بايلانىستىرادى, ولار جىل سايىن نىعايىپ كەلەدى. ءبىز رەسەي وڭىرلەرىمەن ساۋدا-ەكونوميكالىق قاتىناستاردى دامىتۋعا ۇلكەن ءمان بەرەمىز. ءوز تاراپىمىزدان سەرىكتەستىك قارىم-قاتىناسىمىزدىڭ سىزبەن بىرگە قول جەتكىزگەن جەتىستىكتەرىن جاقسارتۋى ءۇشىن بارلىق كۇش-جىگەرىمىزدى جۇمسايتىن بولامىز» دەپ اتاپ ءوتتى قالا اكىمىنىڭ ورىنباسارى. ول سونداي-اق نۇر-سۇلتان اكىمشىلىگى ۋدمۋرت رەسپۋبليكاسىمەن ىسكەرلىك ىنتىماقتاستىقتى كەڭەيتۋ جونىندەگى جاڭا يدەيالار مەن جوبالار ءۇشىن اشىق ەكەنىن ءبىلدىردى.
ءوز كەزەگىندە ۋدمۋرتيا باسشىسى استانالىق اكىمدىك وكىلدەرىن 18-19 قىركۇيەكتە ۋدمۋرتيادا وتەتىن م.ت.كالاشنيكوۆتىڭ تۋعانىنا 100 جىل تولۋىنا ارنالعان قارۋ-جاراقشىلار فورۋمىنا قاتىسۋعا شاقىردى. «قازاقستان مەن نۇر-سۇلتان كاسىپورىندارى ءۇشىن قورعانىس سالاسىنىڭ كاسىپورىندارىمەن قارىم-قاتىناس جاساۋ قىزىقتى بولادى, ونىڭ ۇستىنە فورۋمنىڭ تاقىرىبى اسكەري ەمەس, ازاماتتىق جانە قوسارلى ماقساتتاعى ءونىم بولماق» دەپ تولىقتىردى ۋدمۋرت رەسپۋبليكاسىنىڭ باسشىسى. كەزدەسۋ قورىتىندىسى بويىنشا تاراپتار ناقتى جوبالاردىڭ جول كارتاسىن جاساۋعا كەلىستى, ونىڭ اياسىندا ۋدمۋرتيا جانە نۇر-سۇلتان كاسىپورىندارى ءوزارا ءىس-قيمىل جاسايتىن بولادى.