ەل ەرتەڭىنە ەلەڭدەپ…
ق.قۋانىشباەۆ اتىنداعى اكادەميالىق قازاق مۋزىكالىق دراما تەاترىندا استانا قالاسى ىشكى ساياسات باسقارماسىنىڭ قولداۋىمەن «ەلىمنىڭ تاعدىرى – مەنىڭ تاعدىرىم!» اتتى ءداستۇرلى فورۋم ءوتتى.
«ۇكىمەتتىك ەمەس ۇيىمداردى قولداۋ ورتالىعى» جانە «ۇكىمەتتىك ەمەس ۇيىمداردى قولداۋ ورتالىعى-استانا» جەكە قورلارى ۇيىمداستىرعان بۇل شارانىڭ نەگىزگى ماقساتى – ەلوردا تۇرعىندارى اراسىنان ءتۇرلى ماماندىق يەلەرىنىڭ تىڭعىلىقتى ەڭبەگىن ءارى جەتكەن جەتىستىكتەرىن تانىستىرۋ بولىپ تابىلادى.
فورۋم تاقىرىبى ايتىپ تۇرعانداي, مەملەكەتتىڭ تاعدىرى – ءوز تاعدىرى بولعاندىقتان, اتالعان قورلار قاراپايىم حالىق وكىلدەرىنىڭ تاۋەلسىز قازاقستاننىڭ وركەندەۋىنە قانداي ۇلەس قوسا العاندىعىن كورسەتۋدى ءجون ساناپتى. سوندىقتان كەلەلى باسقوسۋعا «نازارباەۆ ورتالىعى» ۇلتتىق جانە حالىقارالىق باعدارلامالار قىزمەتىنىڭ باسشىسى عالىم سەمبەكۇلى, پارلامەنت ءماجىلىسىنىڭ دەپۋتاتى كامال بۋرحانوۆ, استانا قالاسى كاسىپوداق ۇيىمى كەڭەسىنىڭ توراعاسى سارسەنباي مىڭباەۆ, ت.ب. قوعام جانە مەملەكەت قايراتكەرلەرى جينالدى.
انمەن ارلەنىپ, بيمەن تۇرلەنگەن شارا بارىسىندا الماتى, سارىارقا, ەسىل اۋداندارى بويىنشا وتكىزىلگەن فورۋمداردا ۇزدىك دەپ تانىلعان استانا قالالىق وتان قورعاۋشىلار, مەملەكەت جانە قوعام قايراتكەرلەرى ەسىمدەرىن ماڭگىلەۋ جونىندەگى قوعامدىق كوميسسيانىڭ توراعاسى مەيرام بايعازين, قر ۇلتتىق اكادەميالىق كىتاپحاناسى وقىرماندارعا قىزمەت كورسەتۋ ورتالىعىنىڭ مەڭگەرۋشىسى ءاليا قوجابەكوۆا, «استانا تسيرك» مەمەلەكەتتىك مەكەمەسىندەگى قۇجات اينالىمى جانە اۋدارما قىزمەتىنىڭ مامانى روزا مەيىرباەۆا, مۇگەدەكتەر مەن جالعىز باستى قاريالارعا ۇيدە الەۋمەتتىك كومەك كورسەتۋ بولىمشەسىنىڭ وكىلى بايان جۇماجانقىزى جانە جاستار ىسكەرلىك كەڭەسىنىڭ پرەزيدەنتى قايىربولات ساحمەتوۆ باعالى سىيلىقتارمەن ماراپاتتالدى.
ەركەعالي بولاتۇلى