كەشە ورتالىق سايلاۋ كوميسسياسى كەزەكتەن تىس پرەزيدەنت سايلاۋىندا داۋىس بەرۋدىڭ الدىن الا قورىتىندىسى تۋرالى بريفينگ بەردى.
– 2022 جىلعى 20 قاراشادا وتكەن پرەزيدەنتتىڭ كەزەكتەن تىس سايلاۋىندا داۋىستى ساناۋ ناتيجەسى تۋرالى وبلىستىق, رەسپۋبليكالىق ماڭىزى بار قالالار مەن استانانىڭ سايلاۋ ۋچاسكەلەرىنە سايلاۋشىنىڭ 69,44 پايىزى كەلدى. سايلاۋ كوميسسيالارىنىڭ حاتتاماسى نەگىزىندە 8 ميلليون 300 مىڭ 46 ادام بيۋللەتەن الدى, – دەدى ورتالىق سايلاۋ كوميسسياسىنىڭ توراعاسى نۇرلان ءابدىروۆ.
ءوڭىر تۇرعىندارىنىڭ اراسىندا ساياسي ناۋقانعا جەتىسۋ, قىزىلوردا, تۇركىستان جانە اباي وبلىسىنىڭ تۇرعىندارى بەلسەندىلىك تانىتتى. بۇل وبلىستاعى سايلاۋشىلاردىڭ 80 پايىزدان استامى ءوز تاڭداۋىن جاسادى.
جامبىل وبلىسى سايلاۋشىلارىنىڭ 79,57 پايىزى بيۋللەتەن الدى. سايلاۋدىڭ الدىن الا قورىتىندىسى بويىنشا شىعىس قازاقستان وبلىسىنىڭ 79,49 پايىزى سايلاۋعا قاتىسسا, قوستاناي وبلىسى – 79,28 پايىز, سولتۇستىك قازاقستان وبلىسى – 79,01 پايىز, اقمولا وبلىسى – 78,87 پايىز, قاراعاندى وبلىسى – 78,39 پايىز, پاۆلودار وبلىسى – 77,58 پايىز, ۇلىتاۋ وبلىسى – 75,48 پايىز, اقتوبە وبلىسى – 72,81 پايىز, الماتى وبلىسى – 72,10 پايىز, اتىراۋ وبلىسى 70,87 پايىزدى قۇرادى.
جالپى سايلاۋشىلارىنىڭ 70 پايىزى ساياسي ناۋقانعا قاتىسپاعان ءوڭىردىڭ اراسىندا باتىس قازاقستان جانە ماڭعىستاۋ وبلىسى ەرەكشەلەندى. ءۇش مەگاپوليس شىمكەنت قالاسى سايلاۋشىلارىنىڭ 59,79 پايىزى, استانا قالاسى 48,67 پايىزى, الماتى قالاسى 28,72 پايىزى داۋىس بەردى.
ءار ايماقتاعى حالىقتىڭ ساياسي بەلسەندىلىگىن سايلاۋعا قاتىسۋشىلاردىڭ دەڭگەيى ارقىلى سارالاۋعا ابدەن بولادى. بۇعان الداعى ۋاقىتتا ارنايى توقتالاتىن بولامىز.
ەندى سايلاۋ بيۋللەتەنىنىڭ 6 كانديداتقا ءبولىنۋ رەتتىلىگىن سارالايتىن بولساق, 206206 سايلاۋشى قاراقات ابدەندى قولدادى. بۇل – جالپى سايلاۋشىلاردىڭ 2,60 پايىزى.
نۇرلان اۋەcباەۆقا 176116 سايلاۋشى داۋىس بەردى (2,22 پايىز), جيگۋلي دايراباەۆ 271 641 داۋىس جينادى (3,42 پايىز). مەيرام قاجىكەن 200907 بيۋللەتەن (2,53 پايىز), سالتانات تۇرسىنبەكوۆا 168 731 بيۋللەتەن (2,12 پايىز) الدى. قاسىم-جومارت توقاەۆقا سايلاۋشىلاردىڭ 81,31 پايىزى سەنىم ارتتى. بۇل – 6 456 392 داۋىس بەردى دەگەن ءسوز.
ال سايلاۋشىلاردىڭ 5,80 پايىزى, ياعني 460484 ادام «بارلىعىنا قارسىمىن» دەپ كورسەتىپتى.
سايلاۋ ءراسىمىن پرەزيدەنتكە كانديداتتىڭ 11 مىڭنان استام سەنىم بىلدىرگەن ادامى, شەت مەملەكەت پەن حالىقارالىق ۇيىمداردىڭ 641 بايقاۋشىسى, ساياسي پارتيالاردان 15,5 مىڭ بايقاۋشى, قوعامدىق بىرلەستىكتەردەن 30 مىڭنان استام بايقاۋشى بايقادى.
سونداي-اق سايلاۋ ۋچاسكەلەرىنە قازاقستاندىق بۇقارالىق اقپارات قۇرالدارىنىڭ 1225 وكىلى, 23 ەلدەن 41 شەتەلدىك باق وكىلدەرىن ۇسىناتىن 106 اككرەديتتەلگەن جۋرناليستەر قاتىسىپ, سايلاۋ بارىسىن جاريالادى.
نۇرلان ءابدىروۆ پرەزيدەنت سايلاۋىنىڭ ناقتى ناتيجەسى قاشان, قالاي شىعارىلاتىنىن ءتۇسىندىردى. «قازاقستان رەسپۋبليكاسىنداعى سايلاۋ تۋرالى كونستيتۋتسيالىق زاڭعا سايكەس, اۋماقتىق سايلاۋ كوميسسيالارى داۋىستار سانالعاننان كەيىن ەكى كۇن ىشىندە ءار ءوڭىر بويىنشا حاتتامالاردىڭ تۇپنۇسقالارىن جەتكىزۋگە ءتيىس. بيىلعى 20 قاراشادا وتكەن كەزەكتەن تىس پرەزيدەنت سايلاۋىنىڭ قورىتىندىلارى ورتالىق سايلاۋ كوميسسياسىنىڭ وتىرىسىندا بەكىتىلەدى, ونى وتكىزەتىن كۇن مەن ۋاقىت قوسىمشا حابارلانادى» دەدى ورتالىق سايلاۋ كوميسسياسىنىڭ توراعاسى. ول ورتالىق سايلاۋ كوميسسياسى مەن اۋماقتىق سايلاۋ كوميسسيالارىنىڭ اتىنا كەلىپ تۇسكەن رەسمي جانە بارلىق وتىنىشتەر زاڭنامادا بەلگىلەنگەن تارتىپپەن قارالاتىنىن ايتتى.
