ەلباسىنىڭ تاپسىرماسى بويىنشا, بيىلدان باستاپ ەل ازاماتتارى مەملەكەت تاراپىنان رۇقسات ەتىلەتىن بارلىق قۇجاتتاردى ەلەكتروندى تۇردە نەمەسە حالىققا قىزمەت كورسەتۋ ورتالىقتارى ارقىلى الۋ كەرەك. وسىعان بايلانىس-تى استانا قالاسىنىڭ ادىلەت دەپارتامەنتى دە كوپتەگەن جۇمىستاردى قولعا الدى. سونىڭ ءبىرى – زاڭدى تۇلعالاردى ەلەكتروندىق نۇسقا ارقىلى مەملەكەتتىك تىركەۋ.
بيىل 9 قاڭتاردان باستاپ, «قازاقستان رەسپۋبليكاسىنداعى كەيبىر زاڭنامالىق اكتىلەرىنە زاڭدى تۇلعالاردى مەملەكەتتىك تىركەۋ جانە فيليالدار مەن وكىلدىكتەردى ەسەپتىك تىركەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى كۇشىنە ەندى. وسى قۇجاتقا بايلانىستى ءار ازامات ۇيىندە وتىرىپ-اق, بيزنەسىن 15 مينۋتتىڭ ىشىندە اشا الادى. ول ءۇشىن «ەلەكتروندىق ۇكىمەت» پورتالىنا كىرىپ, قاجەتتى ساۋالدارعا جاۋاپ بەرىپ, زاڭدى تۇلعا رەتىندە تىركەلۋى كەرەك. تىركەۋ قورىتىندىسىندا ءوتىنىش جىبەرگەن ادام مەملەكەتتىك تىركەۋگە زاڭدى تۇلعا رەتىندە تىركەلگەنى تۋرالى انىقتامانى الا الادى.
زاڭدى تۇلعانى تىركەۋ ءۇشىن ءوتىنىش بەرۋ, وعان ەلەكتروندىق تسيفرلىق قولتاڭبا قويۋ, كورسەتىلگەن قىزمەتكە تولەم ءشليۋزى ارقىلى تولەۋ «زاڭدى تۇلعالار» مەملەكەتتىك دەرەكتەر قورىنا ءوتىنىش ارقىلى جۇزەگە اسىرىلادى. وسى ەلەكتروندى قىزمەتتىڭ ارقاسىندا كاسىپكەرلەر تەك ۋاقىتىن عانا ەمەس, قاراجاتىن دا ۇنەمدەي الادى.
وسى جىلدىڭ العاشقى توقسانىندا 600 شاعىن كاسىپكەرلىك سۋبەكتىسى «ەلەكتروندىق ۇكىمەت» پورتالىنا تىركەلىپ, ەشقايدا سابىلىپ جاتپاي-اق, قاجەتتى مالىمەتكە قول جەتكىزدى.
ەلوردانىڭ ادىلەت ورگاندارى وسى باعىتتاعى جۇمىستاردى ودان ءارى جەتىلدىرە تۇسپەك. ويتكەنى, ەلەكتروندى قىزمەت ءتۇرى – مەملەكەتتىك قىزمەت كورسەتۋدىڭ ساپاسىن ارتتىرادى. بۇل ءوز كەزەگىندە ەل ازاماتتارىنىڭ زاڭدى قۇقىلارىنىڭ ساقتالۋىنا, جەكە مۇددەسىنىڭ قورعالۋىنا مۇمكىندىك تۋعىزاتىنى انىق.
گۇلميرا ايماعانبەت
