ەلوردالىق جۇمىسپەن قامتۋ ورتالىعى «CZ Astana» ءموبيلدى قوسىمشاسىن ىسكە قوستى
استانا قالاسى اكىمدىگىنىڭ جۇمىسپەن قامتۋ ورتالىعى «CZ استانا» اتتى ءموبيلدى قوسىمشاسىن ىسكە قوسادى. ءبىر قۋانتارلىعى – بۇل بارلىق ەلوردالىق جۇمىس ىزدەۋشىلەر مەن جۇمىس بەرۋشىلەرگە ارنالعان اقىسىز ءموبيلدى قوسىمشا بولماق.
«CZ استانا» قوسىمشاسىنىڭ مۇمكىندىگى وتە كوپ. ماسەلەن, كاسىبي باعدارلاۋعا قاتىستى تەست ءوتۋ, بوس جۇمىس ورىندارىن ىزدەۋ, افيشا (جوسپارلانعان ءىس-شارالار, كۋرستار, جارمەڭكەلەر, شەبەرلىك ساباقتارى, شاعىن اۋكتسيوندار ءتىزىمى جانە ت.ب.), جۇمىس ىزدەۋشىلەر مەن جۇمىس بەرۋشىلەرگە ارنالعان پايدالى اقپارات (تۇيىندەمەنى قالاي جازۋ كەرەك, اڭگىمەلەسۋ كەزىندەگى سۇراقتارعا قالاي جاۋاپ بەرۋ كەرەك, جۇمىس بەرۋشىنىڭ قۇقىقتارى مەن مىندەتتەرى) جانە پايدالانۋشىعا جۇمىسپەن قامتۋ ورتالىعىنىڭ ورنالاسۋ مەكەنجايىن انىقتاۋعا مۇمكىندىك بەرەتىن گەولوكاتسياسى بار كارتاسى ەنگىزىلگەن. ونى Google Play مەن App Store دۇكەندەرىنەن جۇكتەۋگە بولادى.
ايتا كەتكەن ءجون, قالا اكىمدىگىنىڭ جۇمىسپەن قامتۋ ورتالىعى – ىزدەنۋشىلەر مەن جۇمىس بەرۋشىلەردىڭ ەڭ ۇلكەن بازاسىنا يە جالعىز مەملەكەتتىك ورگان. مەكەمە جۇمىس ىزدەۋشىلەرگە جۇمىسقا ورنالاسۋعا, ال جۇمىس بەرۋشىلەرگە بىلىكتى ماماندار تابۋعا جاردەمدەسەدى. قازىرگى ۋاقىتتا جۇمىسقا ورنالاسۋ, جاستار پراكتيكاسىن ءوتۋ, قوعامدىق جانە الەۋمەتتىك جۇمىستارمەن قامتاماسىز ەتۋ, مامانداردى دايارلاۋ جانە قايتا دايارلاۋ سەكىلدى قىزمەتتەردى ۇسىناتىن امبەباپ الاڭعا اينالىپ كەلەدى.
گۇلميرا ايماعانبەت
