استانا كۇنى مەرەكەسىنە ارنالعان مادەني شارالاردىڭ بىرەگەيى ەسىل وزەنى جاعالاۋىندا, اشىق اسپان استىندا وتكەن «اۋەن-اعىس» كلاسسيكالىق مۋزىكا كەشتەرى بولعانى ايقىن. ءبىر ايتارلىعى, ايتۋلى كونتسەرتتىڭ كورەرمەنى جىل ساناپ كوبەيىپ كەلە جاتقانىن اڭعاردىق.
وزەن ۇستىندە قاتارىنان ءۇش كۇن بويى وتكەن كلاسسيكالىق مۋزىكا كەشتەرىندە ارنايى جاسالعان ورىندىقتاردىڭ بىردە-بىرەۋى بوس قالمادى. ال وزەن ۇستىندەگى ساحنادا ورنالاسقان وركەسترگە, ونىڭ ورىنداۋشىلارىنا قاراپ تىپتەن كوڭىلىڭ اسپانداي تۇسەدى ەكەن. كونتسەرتتەر كۇندە كەشكى ساعات توعىزدا باستالدى. سودان ءتۇن ورتاسىنا دەيىن كلاسسيكالىق مۋزىكا ءۇنى ەسىل اعىسىمەن اۋەلەپ كەتە بەردى.
قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى, «قازاقستان كامەراتاسى» مەملەكەتتىك وركەسترىنىڭ كوركەمدىك جەتەكشىسى گاۋھار مىرزابەكوۆا باستاعان ونەرپازدار قالىڭ كورەرمەندى كەرەمەت اسەرگە بولەگەنىنە كوز جەتكىزدىك. قۇرمانعازىنىڭ «بالبىراۋىن», شتراۋستىڭ «رادەتسكي مارش», ابايدىڭ «ايتتىم سالەم, قالامقاس», موتسارتتىڭ «روندو ۆ تۋرەتسكوم ستيلە» جانە باسقا دا سيمفونيالىق اۋەندەرى ورىندالعاندا تىڭدارمان كوڭىلى ەسىلدىڭ تولقىنىمەن ۇندەسىپ, تاماشا شابىتقا كەنەلگەنى ءسوزسىز. شولپان وڭعاروۆا, مۇسا كەرىمباەۆ, ەركەبۇلان ساپارباەۆ جانە مۇرات ناربەكوۆ سىندى سوليستەردىڭ قۇيقىلجىتىپ سالعان اندەرى تۇنگى ەلوردانى تەربەتىپ تۇرعانداي اسەر بەردى.
عالىم قوجابەكوۆ
