استانا قالاسىنىڭ كاسىپكەرلەر پالاتاسى بيزنەس-پورتالدى ىسكە قوستى.
وسىعان بايلانىستى بريفينگ وتكىزگەن قالالىق كاسىپكەرلەر پالاتاسىنىڭ ديرەكتورى مەيىربەك ءماجيتوۆ قازاق, ورىس جانە اعىلشىن تىلىندەگى www.astana2050.kz بيزنەس-پورتالىندا ەكونوميكانىڭ بارلىق سالاسى بويىنشا تولىققاندى ماعلۇماتتار توپتاستىرىلعانىن اتاپ ءوتتى.
ايتالىق, پورتالدىڭ «قالا ەكونوميكاسى» بولىمىندە بيزنەس تىركەۋدەن باستاپ, بانك سەكتورى, سىرتقى, ىشكى ساۋدا, ونەركاسىپ, قۇرىلىس, كولىك, تۋريزم سىندى قالانىڭ سان الۋان سالالارىنداعى كورسەتكىشتەر جونىندە تولىققاندى اقپارات الۋعا بولادى.
ال, «بيزنەستى مەملەكەتتىك قولداۋدا» كاسىپكەرلەرگە مەملەكەت تاراپىنان قانداي قولداۋلار كورسەتىلەتىنى, قانداي باعدارلاماعا قاتىسۋعا بولاتىنى جونىندە ايتىلعان. سونداي-اق, «دامۋ» قورىنىڭ باعدارلامالارى مەن مەملەكەت ءبولىپ وتىرعان گرانتتار تۋرالى مالىمەتتى دە وسى بەتتەن تابۋعا بولادى.
«بيزنەس جوسپارلاۋ» تاراۋىندا ىسكەرلىك جوسپاردان تارتىپ, بيزنەسكە ارنالعان نەسيە, بۋحگالتەرلىك ەسەپ, ليزينگ, ماركەتينگ, سالىق, مەملەكەتتىك ساتىپ الۋ جانە تەندەر تۋرالى بىلۋگە مۇمكىندىك بار. ءىسىن جاڭادان باستاپ جۇرگەندەر وسى بەتتەن بيزنەستى جۇرگىزۋگە, دامىتۋعا ارنالعان سەمينارلار, كونفەرەنتسيالاردىڭ قايدا وتەتىنىن بىلە الادى.
«استانا كاسىپورىندارى» مەن «يننوۆاتسيالىق استانا» بولىمىندە يننوۆاتسيالىق جوبالاردى جۇزەگە اسىرۋمەن اينالىساتىن ەلوردالىق كومپانيالار تۋرالى اقپاراتتى وقي الاسىزدار.
قىمبات نۇرعالي
