ەلوردا تۇرعىندارى مەن قوناقتارىنىڭ دەمالۋىنا ارنالعان ادەمى جەرلەردىڭ ءبىرى – ەسىل جاعالاۋى. اسىرەسە, وزەن بويىمەن جىلجىپ, استانانىڭ ايشىقتى عيماراتتارىن سۋ ۇستىنەن تاماشالاۋعا مۇمكىندىك بەرەتىن كەمەلەر شىرايلى شاھاردىڭ ءسان-سالتاناتىن ودان ءارى ارتتىرادى.
ەسىلدە كەمە جۇرگىزۋ جوباسى ءاۋ باستا ەلوردانىڭ تۋريستىك تارتىمدىلىعىن ارتتىرىپ, قالانىڭ سىرتقى كورىنىسىن اجارلاندىرا ءتۇسۋ ماقساتىنان تۋىنداعانى بەلگىلى. كەمە جۇرە باستاعان العاشقى كەزدەرى جالپى سىيىمدىلىعى 125 ورىندىق ءۇش جولاۋشىلار كەمەسى جۇرتشىلىققا سەرۋەندىك-ەكسكۋرسيالىق قىزمەت كورسەتتى. ال كەمە جۇرەتىن ۋچاسكەنىڭ ۇزىندىعى 6 شاقىرىمدى قۇرادى.
بۇگىندە ەسىل وزەنىندە 265 ادامدىق سىيىمدىلىعى بار التى جولاۋشىلار كەمەسى, سۇيرەتكىش كەمە, قۇتقارۋ كەمەسى جانە موتورلى قايىق جۇرەدى. كەمە ءجۇرۋ جولى 9,04 شاقىرىمعا ۇزاردى. كەنەسارى ەسكەرتكىشىنىڭ تۇسىنان اتتانعان تەپلوحودتار اقوردانىڭ عيماراتىنا دەيىن بارىپ, كەرى قايتادى. بۇل دەگەنىڭىز – كوزىڭىزدى قىرىق مينۋت بويى سۇلۋلىققا تويدىرىپ, كەرەمەت اسەرگە كەنەلەسىز دەگەن ءسوز. كەمەلەر 12.00 مەن 21.00 ارالىعىندا جۇمىس ىستەيدى.
كەمەلەردىڭ قاۋىپسىز ءجۇزۋىن قامتاماسىز ەتۋ ءۇشىن جىل سايىن ءتۇرلى شارالار اتقارىلادى. ماسەلەن, ناۆيگاتسيا بەلگىلەرى ورناتىلىپ, قوسالقى مەردىگەر ۇيىمداردىڭ كۇشىمەن ىزدەستىرۋ جانە ءتۇپتى تەرەڭدەتۋ جۇمىستارى جۇرگىزىلەدى.
اتالمىش قىزمەت تۇرىمەن استانا قالاسىنىڭ جولاۋشىلار كولىگى جانە اۆتوموبيل جولدارى باسقارماسىنا قاراستى «ەسىل-استانا» مەملەكەتتىك كاسىپورنى اينالىسادى. قازىرگى تاڭدا وندا 70 ادام قىزمەت ەتەدى. قىزمەتكەرلەردىڭ كاسىبي دەڭگەيى جوعارى. باسقارۋ اپپاراتى قىزمەتكەرلەرىنىڭ تۇگەلگە جۋىعى – جوعارى ءبىلىمدى ماماندار. جالپى مامانداردىڭ بارىندە ورتاشا تەحنيكالىق ءبىلىمى مەن ەڭبەك ءوتىلى بار. ولاردىڭ كوبىسى ەسىل وزەنىندە كەمە ءجۇرۋ باستالعاننان بەرى ەڭبەك ەتۋدە.
كەمە جۇرگىزۋدى دامىتۋداعى كوپتەگەن جەتىستىكتەرگە قاراماستان, وزەن كولىگى سالاسىنداعى مامانداردىڭ تاپشىلىعى قيىندىق تۋعىزىپ تۇر. سوندىقتان مەكەمە وزگە وڭىرلەرمەن تىعىز بايلانىس ورناتقان. كەمە تۇراعىنا ارنالعان پورت, كەمە جوندەۋ شەبەرحاناسى, كەمەلەردى ءتۇسىرىپ جانە كوتەرەتىن كران, وندىرىستىك قىزمەتكەرلەر ءۇشىن جابدىقتالعان ءۇي-جاي دا – كۇرمەۋلى ماسەلەلەردىڭ ءبىرى. بىراق جۇمىس بارىسىندا كەزدەسەتىن وسىنداي قيىندىقتارعا قاراماستان, كاسىپورىن وكىلدەرى العا قويىلعان مىندەتتەردى مۇقيات ورىنداپ, ەلوردا تۇرعىندارى مەن قوناقتارىن قاۋىپسىز ءارى جايلى سۋ كولىگىمەن تاسىمالداۋدى پارىز سانايدى.
الداعى ۋاقىتقا جوسپار كوپ. كەمە جۇرەتىن سۋ جولدارىنىڭ ساپالىلىعىن ارتتىرۋ, جولاۋشىلاردى تاسىمالداۋ كولەمىن كوبەيتۋ, ەلوردانىڭ تۇرعىندارى مەن قوناقتارىنا تۋريستىك باعىتتاردى ۇيىمداستىرۋعا قولايلى جاعدايلار جاساۋ, دەمالۋشىلاردىڭ جەكە قاۋىپسىزدىگىن ساقتاۋ ماقساتىندا كەمە جۇرەتىن ۋچاسكەنىڭ پوليتسەيلەردىڭ ۇنەمى قاداعالاۋىندا بولۋى سەكىلدى جۇمىستار بىرتە-بىرتە جۇزەگە اسىرىلىپ كەلەدى.
بوتاگوز ماراتقىزى
